Facebook
Twitter
Google+
YouTube
Blog
RSS Feed
රංග බූන්දි
ඉන්ද්‍රජාලික මඟුල් සැණකෙළි- [රේඩියෝ කතා]
බූන්දි, 19:01:08
පාත්‍ර වර්ගයා- සංවිධායක, මැනේජර්, නිවේදක, කලා කරුවා, අවුරුදු කුමරු, ගැමියා

(ඝෝෂා හඬක් ඉස්මතු වේ. එය ක්‍රමයෙන් අඩුවීමත් සමඟ සියුම් දේශීය සංගීත හඬක් මතුවේ. )

සංවිධායක- (ගාම්භීර ස්වරයෙන්) ඔබලා හැමෝම දන්නවා, මේ ශිෂ්ටපුර ගම්මානය කියන්නේ ප්‍රෞඪ ඉතිහාසයකට උරුමකම් කියන, පැරණි ගම්මානයක් කියල.
(ඝෝෂා හඬ මඳක් මතුවේ )
ඉතිං මගෙ අම්මේ, අප්පොච්චියේ, අත්තේ, මුත්තේ, කිත්තේ, කිරිකිත්තේ, නත්තේ, පනත්තේ , එතනිං ගියාම නැන්දේ, මාමේ, බාප්පේ, මහප්පේ, කුඩම්මේ, මහම්මේ, පුංචි අම්මේ, ලොකු අම්මේ, එතකොට අපේ නංගියේ, මල්ලියේ, දුවේ, පුතේ ඔබලාට කියන්න අති වැදගත් කාරණයක් තියෙනවා. දන්නවද ඔබ සියලු දෙනා අද කමත් යායට කැඳෙව්වෙ මොකද කියල. මොකටද කියලා දන්නවද?
(ඝෝෂා හඬ මතුවේ)
මොකටද? (විරාමය) මොකටද? (විරාමය) මොකටද?

ගැමියෙක්- (බැගෑපත්ව) අනේ අපි නං දන්නෑ බුදු මහත්තයෝ අපිට එන්නයි කිව්වා අපි ආවා.

සංවිධායක- ඔහෙල දන්නවද (ගැඹුරින්) මේ අවුරුද්දෙ අවුරුදු කුමාරයා. ඒ උත්තමයා වඩින්න තීරණය කරලා තියෙන්නේ මේ ගම්මානයට.

පිරිස- මොනවා, ඔය ඇත්තමද!

සංවිධායක- ඔව්, ඔව්. ඔහෙලා වගේ ගුණගරුක, හැදියාසම්පන්න, චාරිත්‍රවාරිත්‍ර අගයන බොහොම නිර්ව්‍යාජ පිරිස් ඉන්න මේ ශිෂ්ටපුර ගම්මානයට එතුමා මේ වසරේ වඩිනවා. (හඬින්) ඔබ සැම එතුමා පිළිගන්න සූදානම් වෙන්න.

ගැමියෙක්- මේ නම් අපේම වාසනාව. ඔව්, අපේම වාසනාව.

පිරිස- හුරේ ජයවේවා ජයවේවා ජයවේවා බවතු සබ්බ මංගලම් ජයවේවා

සංවිධායක- හා... හා... මිත්‍රවරුණි, දැන්ම කලබල වෙන්න එපා. මට දැනෙනවා, මට තේරෙනවා මේක ඔබ සැමට ප්‍රීතිදායක ආස්වාදජනක අවස්ථාවක්. ඒත් අවුරුදු කුමාරයව පිළිගන්න අප විසින් ඉටුකළයුතු යුතුකම් බොහොමයි. අපි හැමෝම අපේ අනන්‍යතාව, සංස්කෘතිය, වත්පිළිවෙත්, චාරිත්‍රවාරිත්‍ර මේ හැම දෙයක්ම එතුමා ඉදිරියේ ඉස්මතු කරන්න ඕන.
(නොසතුටින්) බලන්න මොනවද ඔහෙලා ඔය ඇඳගෙන ඉන්න ඇඳුම්. කකුල් දෙකටම බම්බු වගේ දිග කලිසම්, කොට කලිසම්, නානාප්‍රකාර ෂර්ට්, ටීෂර්ට්, කොටට කොටේ ගවුංකෑලි, සායවල්, බ්ලවුස්, ස්කර්ට්, ජින්ස් (තදින්) මේවා අපේ දේවල්ද? පරදේසක්කාරයෝ ව්‍යාප්ත කරපු සංකර නෙයියාඩගම්. හ්ම්... එහෙනං ඉක්මන් කරන්න. ඉක්මන් කරලා ගිහිල්ලා අපේ ජාතික ඇඳුම් පැළඳුම්වලින් සැරසෙන්න.
(ඝෝෂා හඬ ඉස්මතුවේ. එය කෙමෙන් අඩුවේ.)
කලබල වෙන්න එපා, කලබල වෙන්න එපා. මේ සඳහා අපි විශේෂ වැඩපිළිවෙළක් මේ වෙනකොටත් දියත් කරලයි තියෙන්නෙ. ඔව් හිතවතුනි, ඔබට අවශ්‍ය කරන සියලු ඇඳුම් ආයිත්තම් වස්ත්‍රාභරණ ඇතුළු, ගෙදරදොර භාවිතයට අවශ්‍යකරන අනෙකුන් සියලු දේශීය නිෂ්පාදන මිලදී ගැනීමේ පහසුකම අපි ශිෂ්ටපුර ගම්මානයටම අරගෙන ඇවිල්ලයි තියෙන්නෙ.
(වාහන හඬ ඉස්මතුවේ)
ඔව් අර පේන්නෙ අර මෙහාට පෝළිමේ පැමිණෙන සංචාරක ජංගම වෙළඳ රථවලින්, ඔබට පහසු මිලට මේ හැම දෙයක්ම මිල දී ගැනීමේ වරප්‍රසාදය ලැබෙනවා.
(ඝෝෂා හඬ ක්‍රමයෙන් මතුවේ)
මොකද්ද, මොකද්ද ප්‍රශ්නෙ? මොකද්ද, මොකද්ද ප්‍රශ්නෙ?

ගැමියෙක්- (බැගෑපත්ව) අනේ මහත්තයෝ! අපි මේ ජීවත් වෙන්නේ හේනෙන් කුඹුරෙන් ලැබෙන අස්වැන්නෙන්.

සංවිධායක- ඔව්, ඔව්, අපි ඒක හොඳින් දන්නවා. මට තේරෙනවා ඔහේ කියන්න හදන්නේ ඒකට ස්ථාවර මිලක් නෑ කියලනෙ. අපි ඒ ප්‍රශ්නය සඳහා දැනටමත් පියවර රාශියක් අරගෙනයි තියෙන්නෙ.

ගැමියා- නෑ මහත්තයා මං මේ කියන්න හදන්නේ අපිට ඔය ඇඳුම් ආයිත්තම් බඩුමුට්ටු ගන්න වත්කමක්...

සංවිධායක- (බාධා) නෑ කියලා නේද? මට තේරෙනවා, මට දැනෙනවා. මගේ හදවතට දැනෙනවා ඔහෙලගෙ ප්‍රශ්න. අන්න ඒ හින්දා තමයි පහසු ගෙවීමේ ක්‍රම, සහන ණය ක්‍රම, පොලී ක්‍රම වගේ විධික්‍රමරාශියක් අපි හඳුන්නලා දීලා තියෙන්නෙ. හොඳින් මතක තියාගන්න මේක අපේම අනන්‍යතාව තියෙන අපේම අලුත් අවුරුද්ද. ඒකෙදි එකම හැඟීමකින්, එකම අරමුණකින්, එකම බැඳීමකින් එකාවගේ අපි කටයුතු කරන්න ඕන. (ඈතට) යන්න. යන්න ඔය අත්තා යන්න. ගිහිල්ලා ඔය සරං කඩමාල්ල ගලවලා අමුඩ කෙටියක් ගහගන්න. ඔය නංගිලා මොකද බලාගෙන ඉන්නෙ? යන්න ඔය ගවුං කොට, ස්කර්ට්, බ්ලවුස් ගලවලා ඇඳගන්න චීත්ත රෙද්දකුයි, තනපටයකුයි. ඉක්මන් කරන්න. තව බොහොම ටික වේලාවයි තියෙන්නෙ මේ හැම දෙයක්ම කරන්න.
(ඝෝෂා හඬ වැඩිවී අඩවී යයි. සංගීත හඬ මදක් මතුවේ)
කොහොමද, කොහොමද මැනේජර් අනෙක් වැඩකටයුතු?

මැනේජර්- හැම කටයුත්තක්ම ඉදිකිරීම් ඩිපාට්මන්ට් එක නොම්මර් එකට කරගෙන යනවා. ගැමි පරිසරය පැරණි විදියටම කන්ස්ට්‍රක් වෙනවා. අර බලන්න පොල් අතු පිදුරුවලින් ගැමි පැල්පත් මඩු සකස් කරලා තියෙන අපූරුව. අපිට පුදුම සහයෝගයක් ගැමි මිනිස්සුන්ගෙන් ලැබෙන්නෙ.

සංවිධායක- බොහෝම හොඳයි, බොහෝම හොඳයි.

මැනේජර්- පේන්ට් ඩිපාට්මන්ට් එක මිනිස්සුන්ගෙ ගෙවල්දොරවල් ඇන්ටික් විදියටම පේන්ට් කරන්න පේන්ට් බෙදාහරිනවා.

සංවිධායක- බොහෝම හොඳයි, බොහෝම හොඳයි!

මැනේජර්- අර ෆෘට් ඇන්ඩ් ෆ්ලවර් ඩිපාට්මන්ට් එක හැම ගහකම පළතුරු එල්ලනවා. මොකද සර් මේ කාලෙට කියන්නෙ වසන්ත කාලෙ කියලනෙ. අර බලන්න. ඇපල්, මිදි, දොඩම්, රඹුටං, මැංගුස්, ගස්වල බබළන හැටි. හරිම අපූරුයි. පරිසරයම පළතුරු විමානයක්. ඒ වගේම අනික් පැත්තෙන් එරඹොදු මල්, ඉද්ද මල්, රෝස මල්, උඩවැඩියා, කානේෂන් ගස්වල එල්ලගෙන යනවා. මුළු පළාතම දැන් මලින් පළතුරින් පිරිලා.

සංවිධායක- බොහෝම හොඳයි, බොහෝම හොඳයි. මුදල් ගැන කිසිම ප්‍රොබ්ලම් එකක් තියාගන්න එපා. අපේ අනන්‍යතාව අපේ සංස්කෘතිය ඉස්මතු කරනඑක තමයි මෙතැනදි ප්‍රධානම ටාගට් එක වෙන්න ඕන. ම්... (රසවිඳිමින්) කොහෙන්ද මේ මිහිරි කෑම සුවඳක් එන්නෙ?

මැනේජර්- ඇයි සර් අන්න අර පැත්තෙන්. එතන අපේ දේශීය ආහාරපාන ඔක්කොම සකස් වෙනවා.

සංවිධායක- (කලබලයෙන්) අපි යමු ඒ පැත්තට.

මැනේජර්- මේ පාර ඔක්කොම දේශීය ෆුඩ් ඇනවුම් බාර දුන්නේ ලංකාවේ සුපිරිම හොටෙල් ඩිපාට්මන්ට් එකට. ගමේ ගොඩේ ගෑනු හදන බඩජාරි කෑම වගේ නෙමෙයි. මේවා දේශීය ක්‍රමයට ස්වාභාවිකව පිරිසිදුව නිෂ්පාදනය කරන්නෙ, පිටරට කුකරි පාඨමාලා හදාරපු ස්පෙෂලිස්ට්ලගෙ ඇඩ්වයිස් මත.

සංවිධායක- බොහෝම හොඳයි, බොහෝම හොඳයි.

මැනේජර්- (අවධානයෙන් ) සර් මේ තියෙන්නෙ කැවුම් කන්ස්ට්‍රක්ෂන් මැෂින් එක. බලන්නකො සර් ඒක වැඩ කරන අපූරුව. ටියුබ් එකකින් කැවුම් පිටි මික්ස්චර්, තෙල් ප්ලේට් එකට වැක්කෙරෙනවා. (වැක්කෙරෙන හඬ) ආ... ඔන්න කැවුම හැදෙනවා. බලන්නකො සර් කැවුමෙ කොණ්ඩෙ උස්සන්න වෙනම වීල් එකක් මැදින් කැරකෙන අපූරුව. ආ ඔන්න කැවුම මල වගේ පිම්බිලා ආවා. දැං හොඳට බැදෙනවා. ආ මෙන්න දැං තෙල් බේරෙන ගමන් කන්වේයර් බෙල්ට්එක දිගේ පහළට ගිහිං එකතු වෙනවා.

සංවිධායක- බොහෝම හොඳයි, බොහෝම හොඳයි, අපූරුයි

මැනේජර්- සර්, මේ විදියට කොකිස්, මුංගුලි, අග්ගලා, අළුවා, පැණි වළලු, එතනින් ගියාම ආස්මී, කලුදොදොල් හැම දේශීය කෑමක්ම කන්ස්ට්‍රක් වෙනවා. (එක්වරම) ආ... සර්, තව හාල් පිටි ටොන් දෙකකුයි, පොල්තෙල් බවුසර් දෙකකුයි, ගෑස් සිලින්ඩර් පන්සීයකුයි, භූමිතෙල් බවුසර් විසිපහකුයි අවශ්‍ය වෙලා තියෙනවා.

සංවිධායක- (සිනාමුසුව) අවශ්‍ය කරන ඕනම දෙයක් ගෙන්න ගන්නවා. අන්තිමට මට සීල් එකක් ගහපු බිලක් දෙනවා. එච්චරයි.

මැනේජර්- ඒත් සර් විශාල ප්‍රශ්නයක් තියෙනවා.

සංවිධායක- ප්‍රශ්නයක් ? මොකද්ද ප්‍රශ්නෙ, මොකද්ද දැං තියෙන ප්‍රශ්නෙ

මැනේජර්- සර්, කතුරු ඔංචිල්ලාවට හෝස් පවර් පනහක මෝටර් එකක් ඉම්පෝට් කරන්න ඕන.

සංවිධායක- මේ හදිස්සියේ?

මැනේජර්- ඔව් සර්.

සංවිධායක- (නොසන්සුන්ව) ඒ මොන හත්ඉලව්වකටද?

මැනේජර්- මේ ගමේ ඉන්න පරඬැල් එකෙක්ටවත් කතුරු ඔංචිල්ලාව කරකවගෙන පදින්න හයිය හත්තියක් නෑ. මිනිස්සු බොහොම දුර්වලයි හාමත්වෙලාම. ඒත් සර් මේ වගේ අපේම දේශීය උත්සවේකදි මිනිස් ශක්තිය, ජවය අපි කොහොම හරි මතු කරලා පෙන්නන්න ඕන.

සංවිධායක- බොහෝම හොඳයි, බොහෝම හොඳයි. එහෙම තමයි වෙන්න ඕන.

මැනේජර්- අන්න ඒ හින්ද අපිට මේක කරකවන්න වෙන්නෙ මෝටරේකින්.

සංවිධායක- බොහෝම හොඳයි, බොහෝම හොඳයි. හැබැයි එකක් මතක තියාගන්නවා, මේ කිසිම දෙයක් අවුරුදු කුමාරයට හොයාගන්න බැරි විදියට සකස් වෙන්න ඕන.
(කොවුලන් රැසක් කෑගසන හඬ ඉස්මතුවේ.)

මැනේජර්- (සන්සුන්ව) හැම දෙයක්ම එහෙම තමයි සිද්ද වෙන්නෙ. අපි ඉම්පෝර්ට් කරපු කොවුලො පන්සීයක් ගම පුරාම අතෑරියා. අර බලන්න උන් කෑ ගසමින් ඉගිල්ලෙන හැටි. ඒ වගේම ගම ආලෝකවත් කරන්න දේශීය පන්නයේ කොප්පරා පහන් විදියෙ ලයිට් දැනටමත් සූදානම් වෙනවා.
(වාහන හඬ මතුවේ.)
ආ සර් අන්න, කෑම බෙදන්න ඕන කරන කෙසෙල් කොළයි, නළුම් කොළයි පුරවපු ලොරි දෙසීයයි, ගිනි දල්වන්න ඕන කරන සඳුන්, තේක්ක, මිල්ල, බුරුත දර කොට පුරවපු ලොරි පනහයි මේ පැත්තට එනවා.
(ජන ගී හඬ ද මිනිසුන්ගේ ඝෝෂා හඬද, සංගීත හඬද ඉස්මතුවේ.)

සංවිධායක- බොහෝම හොඳයි, බොහෝම හොඳයි. එතකොට මැනේජර් කොහොමද සංස්කෘතික ප්‍රසංගෙ වැඩකටයුතු?

මැනේජර්- ඔය දැනටමත් පේන්නේ සාම්ප්‍රදායික කලාකරුවෝ ජන නැටුම්, ජන ගායනා පුහුණු වෙනවා. අර පැත්තෙ කලාකාරයෝ සිරිත්විරිත් කටපාඩම් කරනවා. මේ පාර දේශීය සංගීත හා නැටුම් භාණ්ඩ නිෂ්පාදන ඕඩර් එක නම් අපූරුවට කෙරිලා තියෙනවා.

සංවිධායක- බොහෝම හොඳයි, බොහෝම හොඳයි.

මැනේජර්- (හඬ අඩුවෙන් ) ආ සර්, සාම්ප්‍රදායික නර්තන ගායන ටීම්වල මොඩලිස්ට්ලට ලොජ් වෙන්න සර් කියපු විදියටම ''ෆයිව් ස්ටාර් හෝටලයක්'' බුක් කළා. ඇහැට කණට පේන මොඩලිස්ලව ස්පෙෂල් රූම්ස්වලට කැටගරයිස් කළා.

සංවිධායක- බොහෝම හොඳයි, බොහෝම හොඳයි. ඒකියන්නෙ හැම වැඩකටයුත්තක්ම අපි ප්ලෑන් කරපු විදියටම අකුරටම සීයට සීයක්ම කෙරීගෙන යනවා.

මැනේජර්- සත්තකින්ම සර්, සත්තකින්ම. බලන්නකො සර් ගමේ අපූරුව. මුළු කෙත් යායම ඩෝසර් කරලා පිදුරු අතුරලා, පැලවල් ඉදි කරලා, දේශීය කැටයමින් සරසලා, කොප්පරා පහන් පත්තු කරලා දේශීයත්වයෙන් වෑහෙන්න. අපිට පුළුවන් අවුරුදු කුමාරයාව හරසරින්ම මේ පාර පිළිගන්න.
(සංගීතය ඉස්මතුවේ. ඒ අතරින් ඝෝෂා හඬ වෙඩි හඬ හා රබන් පද හඬ මතුවේ)

නිවේදක- ඔව් මේ අසිරිමත් මොහොතේ අපි හැමෝටම වසන්තය උදා කරමින් සූර්යයා මීන රාශියේ සිට මේෂ රාශිය දක්වා සංක්‍රමණය වුණා. මේ ශිෂ්ටපුර ගම්මානයේ හැමෝම එක සුදු පැහැති වස්ත්‍රාභරණයෙන් සැරසිලා වැඩිහිටි, මහලු, තරුණ, ළදරු හැමෝම ඉතා සතුටින් සහයෝගයෙන් මේ අසිරිය භුක්ති විඳින ආකාරය අපට දැක ගන්නට පුළුවං.
(ඔංචිලි වාරම් හඬ ඉස්මතු වේ.)
ඔංචිලි වාරම් කියමින් යුවතියෝ තරුණයෝ කතුරු ඔංචිල්ලා පදින හැටි, ජන ක්‍රීඩාවල නියැලෙන හැටි, දැකුමට ප්‍රියමනාපයි. ඔව්, තව ස්වල්ප මොහොතකින් අවුරුදු කුමාරයා මේ භූමියට ගොඩබසිනවා. (ගැඹුරින්) ගව් දසදහස් ගණනක ඈත ඉඳලා වලාකුළෙන් බැහැලා, දිව්‍ය සළු ආභරණයෙන් සැරසිලා, වෘෂභ රංචුවක් බැඳි තිරික්කල රථයකින් එතුමා මෙම ශිෂ්ටපුර ගම්මානයට වඩින්නට නියමිතයි. ඔව් අපි හැමෝම එතුමා පිළිගන්න සූදානම් වෙමු.

(රබන් පද හඬ හා සංගීත හඬ ඉස්මතුවේ)

මැනේජර්- (කලබලයෙන් ) සර් මාර ප්‍රශ්නෙ? මොකද සර් අවුරුදු කුමාරය තාමත් ප්‍රමාද?

සංවිධායක- ඒක තමයි අයිසෙ මාත් මේ කල්පනා කරන්නෙ.

මැනේජර්- බලනකොට දෙවියොයි මිනිස්සුයි හැමෝම එකයිනෙ.

සංවිධායක- දැං මොකද අපි කරන්නෙ? (කල්පනාකර) ම්... හරි මං කියන්නං. කෝල් එකක් දාල බලමු. කියන්න බෑනෙ මොකක් හරි ප්‍රශ්නයක්ද කියලා. ඔව් අපි කෝල් කරමු.

මැනේජර්- කාටද සර්?

සංවිධායක- වෙන කාටද අයිසෙ අවුරුදු කුමාරයට. ම්...

මැනේජර්- මොනවද සර් මේ කියවන්නේ?

සංවිධායක- කෝල් කරනවා, ආ... මෙන්න නම්බර් එක. නැහැ ඉන්නවා මම ම ඩයල් කරන්නං.
(ටෙලිපෝනය අංක ඔබන හඬ රබන් පද හඬ මතුවේ.)

නිවේදක- ඔව් දැන් ආහාර පිසීමේ නැකතත් ඉතා කිට්ටු වේගෙනයි එන්නේ. මේ වෙනකොට මේ කමත් යාය මැද්දේ මීටර් පනහක විශ්කම්භයකින් යුක්ත චෛත්‍යයක් තරං විශාල නැවුම් මුට්ටියක් කබොක් ගලින් බැඳි විශාල ලිපක් උඩ තබා තිබෙන ආකාරය අපට දැක ගන්නට පුළුවං. ඒක පේන්නෙ හරියට මිරිසවැටි සෑය වගෙයි. ඔව් මේ අවස්ථාවේ ලිප ගිණි මෙළවීම සඳහා අවශ්‍ය සියලුම දර, ඉන්ධන දෙපාර්තමේන්තුව යටතේ ලිපට දැමීමට සූදානම් වෙනවා. ඒ එක්කම මුට්ටියට කැකුළු සහල් විශාල කැටපිලර් යන්ත්‍රයකින් දැමීම හමාර කළා. (හාල් දමන හඬ) ඔව් දැන් මුට්ටියට බෆලෝ කිරි සමාගම කිරි බවුසරයකින් කිරි පොම්ප කරන ආකාරය අපට පෙනී යනවා. (කිරි පොම්ප කරන හඬ) අද කැකුළු හාල් මුට්ට පන්සීයක කිරිබතක පිසීමටයි මේ සූදානම. ශ්‍රී ලාංකීය ඉතිහාසයේ විශාලම කිරිබතින් මුළු ශිෂ්ටපුර ගම්මානයටම සංග්‍රහ කිරීම මෙහි අරමුණයි. ඔව් මේ අවස්ථාවේ කිරිබත කූරුගෑම සඳහා සුදෝසුදු පැහැති චීත්ත හා තනපට ඇඳගත් ගැමි යුවතියන් විශාල ලිප වටා ඉදි කර ඇති විශේෂ වේදිකාව උඩට ගොඩ වෙනවා. (අඩි හඬ) ඔව් තවත් ස්වල්ප මොහොතයි ලිප ගිණිි මෙළවීමේ චාරිත්‍රය ඉටු කිරීමට තියෙන්නේ. සියලුම ගම් වැසියන් එකම හැඟීමකින් දැන් උතුර දෙස බලා සිටින අයුරු අපට දැකගන්නට පුළුවන්. ඔව් තව තත්පර පහයි, හතරයි, තුනයි, දෙකයි, එකයි... ඔව් දැන් ලිපගිණි මොළවන්න.
(වෙඩි හඬ, ගින්දර පත්තු වෙන හඬ)
ඔව් මෙ අවස්ථාවේදී ගිණි නිවීමේ හමුදාවේ සහාය ඇතිව ඉතා මහලු මවක් විසින් ලිපිගිණි මෙළවීමේ චාරිත්‍රය ඉටු කරමින් විශාල ලිපක් දැල්වුවා.
(රබන් පද හඬ හා සංගීත හඬ මතුවේ )
මුළු පළාතම ආලෝකවත් කරමින් තේක්ක, බුරුත, මිල්ල දර කොටං, ලිප තුළ දැවෙන ආකාරය දැන් අපට දැක ගන්න පුළුවං. ශිෂ්ටපුර ගම්මානයේ සියලුම වැසියන් එකම හැඟීමකින්, එකම භක්තියකින් මේ විශාල ලිපගිණි දල්වන අයුරු බලා සිටින දසුන ආස්වාදජනකයි. මෙලෙස අපේ චාරිත්‍ර එකම සිතින් එකම හැඟීමෙන් එකම වෙලාවට ඉටු කිරීමට ලැබීම අපේ උරුමයන් රැකීමක්.
(රබන් හඬ වැඩවේ)

මැනේජර්- සර්ට හොඳටම විශ්වාසද අවුරුදු කුමාරයා වඩින දිනයයි වෙලාවයි හරියටම හරි කියල.

සංවිධායක- ඇයි මිනිහෝ මේක අද ඊයේ ඉඳං සිද්ද වෙන වැඩක්ද? අවුරුදු දෙදහස් පන්සියයක් තිස්සෙම මෙහාට ආව ගිය මිනිහා, අප්‍රේල් දාහතර වෙනිදා නැකතට අනිවාර්යෙන් ම මෙහාට එන්න ඕන.

මැනේජර්- ඒත් මොකද මේ තරම් පරක්කු? මං කියන්නෙ මිනිහට ඩිසිප්ලීන් එකක් තියෙන්න ඕන අඩුම වශයෙන් අපිට ප්‍රමාදය ගැන ඉන්ෆෝම් කරන්න.
(බෙර හා ජන ගී හඬ නැවතත් වැඩිවේ)

නිවේදක- ඔව් ඉතා ප්‍රීතිජනක අයුරින් සාම්ප්‍රදායික නර්තන හා ගීත කණ්ඩායම් මේ වෙනකොට සැණකෙළි දක්වනවා. ඒ වගේම අපේ රටේ විශාල කලාකරුවෝ සංඛ්‍යාවක් මේ උත්සව භූමියේ රැඳී ඉන්නවා. අපි කැමතියි කිරිබත ඉදෙන කල් අපේ පැරණි කලාකරුවෙක් සමඟ නිමේෂයක සොඳුරු කතාබහකට මුලපුරන්න. ඉතිං ආයුබෝවන්ඩ, ආයුබෝවන්ඩ කලාකරුවාණෙනි, ආයුබෝවන්ඩ.

කලාකරුවා- ආයුබෝවන්ඩ, ආයුබෝවන්ඩ. ඒ කියන්නෙ ආයුෂ බොහොමයක් වැඩි වර්ධනය වෙන්න කියන එකනෙ.

නිවේදක- එහෙමයි, එහෙමයි. ඔව් ඉතිං ඔබතුමාට පුළුවන්ද අපිට විස්තර කරන්න මේ අති උත්කර්ෂවත් අවස්ථාවේ අවුරුදු උත්සවේ ඉතිහාසය සම්බන්ධව.

කලාකරුවා- ඔව්, පුළුවං... පුළුවං. ඇත්ත වශයෙන්ම කියනවනං මේ අවුරුදු උත්සවවලට එතරම්ම ඈත ඉතිහාසයක් නෑ.

නිවේදක- නෑ, (රහසින්) නෑ, නෑ. මොනවද ඔහේ මේ කියවන්නේ.

කලාකරුවා- මං කියන්නේ මිනිස්සුන්ගේ වත්පිළිවෙත්, පුදපූජා, යාතුකර්ම, ජනක්‍රීඩාවල ඉතිහාසය බොහෝ ඈතකට යනවා.

නිවේදක- ඔව්. අන්න හරි, අන්න හරි අන්න එහෙම කියන්න.

කලාකරුවා- ගෝත්‍රික යුගයේ සිට වැඩවසම් යුගයේ අවසානය දක්වා මිනිස්සු ළඟ ව්‍යභිචාර වත්පිළිවෙත් බොහෝ ලෙස පැතිරුණා. සූර්ය නමස්කාරයත් ඉන් එකක්. ඒත් අද මේ පවත්වන අවුරුදු සැණකෙළි කියන්නෙ ඊයේ පෙරේදා නිර්මාණය කරපු... (හඬ මැකීයයි)

සංවිධායක- කවුද අර මිනිහා. ඒ මිනිහව කවුද මෙහාට ගෙන්නුවෙ?

මැනේජර්- ඒක තමයි කවුද මේ මිනිහා. මිනිහා මිනිස්සුන්ව වටකරගෙන දෙසාබානවා.

සංවිධායක- (අවධාරණයෙන් ) හරි, මං අඳුරගත්තා. අපේ ව්‍යාපාරය අඩාළ කරලා කඩාකප්පල් කරන්න එවපු කුමන්ත්‍රණකාරයෙක්. හරි, හිතහිතා හිටියොත් වැඩේ ඉවරයි. කරන්න තියෙන්නෙ එකම එක දෙයයි.

මැනේජර්- ඒ මොකද්ද?

සංවිධායක- ආ... මෙන්න ඉක්මන් කරනවා. යනවා ගිහිං තියනවා ඔලුකට්ට කුඩුවෙන්න.

මැනේජර්- මේ අලුත් අවුරුද්දෙ?

සංවිධායක- අපිට විරුද්ධ බලවේගවලට මොන අලුත් අවුරුද්දකවත් ඉස්මතු වෙන්න ඉඩ දෙන්න බෑ. තියනවා ඉලක්කයටම. යනවා ඉක්මන් කරනවා.
(කලා කරුවාගේ හඬ මතුවේ.)

කලාකරුවා- ඈත අතීතයේ මිනිසා කාලය තීරණය කළේ තමන්ටම ආවේණික වූ ක්‍රමවේදයක් එක්ක. ඒත් මධ්‍යතන යුගයේ අවසානවීමත් සමඟ රෝමයේ භාවිතා වූ ග්‍රෙගෝරියන් කියන දින දර්ශනය පෙර අපර දෙදිග හැම රටකම ව්‍යාප්ත වුණා.

සංවිධායක- (රහසින් ) හරියටම ඉලක්කය මානනවා තිතටම, මිනිහගෙ ඔලු කට්ටටම.

මැනේජර්- සර්, මිනිහා එහාට මෙහාට අංග චලනය දානවනෙ. ශිෂ්ටපුරේ මිනිස්සු මිනිහගෙ කතාවට වශී වෙලා.

කලාකරුවා- ග්‍රෙගෝරියන් දින දර්ශනය, ඒ කියන්නෙ දැං අපි භාවිතා කරන දින දර්ශනයට අනුව අවුරුද්දේ පළමුවැනිදා යෙදෙන්නේ ජනවාරි මාසෙට. එදා තමයි අලුත් අවුරුද්දෙ මුල. ඒත් පැරණි දින දර්ශන ක්‍රමයට අනුව අවුරුද්දෙ මුල් දිනය යෙදුනේ අප්‍රේල් හෙවත් බක්මහේ. මේ අළුත් දින දර්ශනය පැණ්නෝ පිළිගත්තේ නෑ. ඔවුන් සුපුරුදු විදිහට බක්මහේ තම අවුරුද්ද පැවැත්තුවා. ඉතිං අලුත් ක්‍රමයට ජනවාරි මාසෙ අලුත් අවුරුද්ද සමරන පිරිස් අප්‍රේල් මාසෙ තාමත් අවුරුදු සමරන පැරැණ්නන් සමච්චලයට ලක්කළා, මෝඩයගෙ අවුරුද්ද සැමරීම කියල. මෙන්න මේ විදියට තමයි අප්‍රේල් පළවෙනිදා මෝඩයගේ දිනය කියලා ප්‍රසිද්ධ වුණේ.

(වෙඩි පුපුරණ හඬක් ඉස්මතු වේ, කෑ ගැසීම් ඝෝෂාකාරී බවක් ඇසේ සංගීතය මතුවේ.)

නිවේදක- ඔව්, මල් වෙඩි හඬ මැද්දෙන් කිරිබත අපූරුවට ඉදෙන ආකාරය අපට දැක ගන්නට පුළුවන්. අහසට දුම් වළලු වලා කැටියක් මෙන් විසිරී යනවා. හරියට මීදුමක් වගේ චමත්කාරජනකයි. විශේෂ වේදිකාවක සිටින යුවතියන් රබන් පද තාලයට ලතාවකට කිරිබත් මුට්ටිය කූරුගානවා. ඔවුන්ගේ ඉඟ, ළැම, පුළුලුකුල සිහි කරවන්නේ දිව්‍ය කාන්තාවන්ගේ නර්තන ස්වරූපයක්. අර බලන්න මිත්‍රවරුණි, අර ඈත ආකාශයේ විශාල හෙළිකොප්ටර් යානයක ඉඳන් ඉන්දියාවේ හිමාල වනයෙන් ගෙන්වන ලද පිච්ච, අරලිය, එරබදු, සේපාලිකා මල් බිමට පතිත වන ආකාරය කොයිතරම් අපූරුද.
(හෙළිකොප්ටර් හඬ)
මල් වරුසාවක්, ඔව් මල් වරුසාවක් කඩා හැළෙනවා. ඔව් දැන් කිරි උතුරන්න ආසන්නයි. ඔව් විශාල කිරිබත්, චෛත්‍යයක් තරං උස කිරිබත් මුට්ටියෙන් කිරි බුබුළු ඉහළ පහළ විසි වෙනවා. හරියට කිරි මුහුද කැළඹී රළ ගසන්නා වගේ. ඔව් දැන් මුට්ටියෙන් කිරි උතුරා යනවා. (කිරි උතුරන හඬ) සකල ගම්වාසී හැමටම සුබ අලුත් අවුරුද්දක්
(වෙඩි හඬ, රබන් සුරල් හඬ මතුවේ, ටෙලිෆෝන් එක අංක ඔබා ඩයල් කරන හඬ ද මතුවේ.)

ටෙලිෆෝනයේ හඬ-
ඔබ ඇමතූ ජංගම දුරකතනයෙන් ප්‍රතිචාරයක් නොමැත. කරුණාකර පසුව අමතන්න. ද නම්බර් යූ ඩයල් ඊස් නොට් රෙස්පොන්ඩඩ්, ප්ලීස් ඩයල් ෂෝර්ට්ලි. නේංගල් තොලෙච්චිය ඉලක්කම් පාවෙනම් ඉල්ලෙ.

සංවිධායක- (නොසන්සුන්ව) ෆෝන් එක කනෙක්ට් වෙන්නෑ. මට හිතාගන්න බෑ මොකද දැං කරන්නෙ කියලා.

මැනේජර්- සර්, කරන දෙයක් ඉක්මනට. දැං අනුභව නැකතට හොඳටම කිට්ටුයි.

(රබන් හඬ ඉස්මතු වෙයි.)

නිවේදක- ඔව් මේ අවස්ථාවේ කැටපිලර් යන්ත්‍රය මඟින් විශාල මුට්ටියෙන් කිරිබත් කෙසෙල් කොළවලට දමන ආකාරය දැකගන්න පුළුවං. (කැටපිලර් හඬ) උණු උණු කිරිබතේ කිරි සුවඳ මුළු පළාතම සුගන්ධවත් කරනවා. ඔව් ගමේ සියලු දෙනාම ඉතා සහයෝගයෙන් එකතු වෙලා කිරිබත් කෙසෙල් කොළවලට වඩන ආකාරය හරිම රිද්මයානුකූලයි. හරියට පොළවමත හිමකුට්ටි අතුරනවා වගේ.

සංවිධායක- හලෝ, හලෝ... අවුරුදු කුමාරයා... මේ මේන් ඕගනයිසර් සන්කයින් ලීඩර් කතා කරන්නෙ.

අවුරුදු කුමරු- (දුරකතනයතුළින් කථා කරන හඬ) හලෝ මට ඇහෙනවා. ඔව් කතා කරන්න. කියන්න.

සංවිධායක- මොකද තාම ප්‍රමාද? (ලයින් එක කට් වෙන හඬ) ෂිඃ... ලයින් එක කට් වුණා.

(රබන් සුරල් හඬ මතුවේ.)

නිවේදක- ඔව් හිතවතුනි, අවුරුදු කුමාරයා මේ දැන් මේ ස්ථානයට වඩින බව ආරංචි වුණා. එතුමා මේ ළඟක සිට එන ගමනක් නෙවෙයි මේක. ගව් ගණනක දුර සිට තිරික්කල රථයෙනුයි මේ ස්ථානයට වඩින්නෙ. ඔව් දැං ආහාර අනුභව කිරීමේ නැකතට තත්පර තුනයි, දෙකයි, එකයි... ඔව් දැන් සැවොම උතුර දෙස බලා එකම හැඟීමකින් යුතුව කිරිබත් අනුභව කරන්න.

(රබන් පද හඬ මතුවේ. ජන ගී හඬ සමඟ සංගීතය ඉස්මතුවේ.)

කලාකරුවා- සංවිධායකතුමෝ, කෝ අවුරුදු කුමාරයා. එනව කියපු අවුරුදු කුමාරයා.

මැනේජර්- (තදින්) ආ උඹ ආයිත් ආවද? එන්න එපා ඉදිරියට එන්න එපා. දැක්ක නේද මේක. අවුරුද්දෙ ඉස්ඉස්සෙල්ලම උඹේ ඔළුවට වැඩ අල්ලන්න කලින් මෙතනිං තොලොංචි වෙයං.

කලාකරුවා- මං කෑ ගහනවා. ඔව් මං කෑ ගහනවා. මිනිස්සුන්ගෙ අහිංසක හැඟීම් උගසට අරගෙන දියත් කෙරෙන මේ කූට වෙළඳ සූරාකෑමේ ව්‍යාපෘති නවත්තපං. මිනිස්සුන්ගෙ සැබෑ ප්‍රශ්න දිහා බලපං.

සංවිධායක- දැනගනිං මේක අපේ අලුත් අවුරුද්ද.

කලාකරුවා- කවද්ද ඒක උඹලා බදු ගත්තේ?

සංවිධායක- හොඳ හිතිං කිරිබත් කෑල්ලක්, කෙසෙල් ගෙඩියක් කාලා මෙතනිං තොලොංචි වෙලා තමන්ගෙ වැඩක් බලාගනිං.

කලාකරුවා- නෑ මං යන්නෑ. මං කියා සිටිනවා මේ මිනිස්සුන්ට, මං කෑ ගහලා කියනවා මේ අයට කෝ අවුරුදු කුමාරයා කවද්ද කොහෙන්ද මෙහාට එන්නේ?

සංවිධායක- කෑ ගහපං, හයියෙන් කෑ ගහපං. කාටවත් උඹේ හඬ වැඩක් නෑ. මිනිස්සු හැමෝම අපේ කිරිබත් කෙසෙල් කලා සැණකෙළි සිරියෙන් කුල්මත් වෙලයි ඉන්නෙ. ඔව්, කෑ ගහපං. (හඬින්) ඔව් මේ අවස්ථාවේදී වලාකුළෙන් බැස ඒ අසිරිමත් අවුරුදු කුමාරයා මේ ස්ථානයට සම්ප්‍රාප්ත වුණා. ඔව් හැමෝම නර්තනයේ යෙදෙන්න. ජන ගී ගයන්න. ප්‍රීති වන්න. ඔබ බලා සිටි එතුමා, ඒ උත්තමයා පැමිණියා.

නිවේදක- කෝ කොහෙන්ද එතුමා ආවේ? කොහෙද එතුමා ඉන්නේ?

සංවිධායක- ඔව් අර ඉන්නෙ එතුමා. බලන්න දිව්‍ය සළු පොරොවා ගෙන ගාම්භීර ලීලාවෙන්, තේජසින්, ප්‍රීතියෙන් ඉපිලෙමින් ඔබගේ රංග විලාසයන්, චාරිත්‍රයන්, හැදියාවන් දෙස එතුමා බලා සිටිනවා.

නිවේදක- කෝ... කොහෙද මට පේන්නෑනෙ. මොනනවා මට පේන්නෑනෙ. ම්...

සංවිධායක- ඔහුව පේන්නේ උගත්, බුද්ධිමත්, ණැනවත්, ඒවගේම බලවත් අයට පමණයි.

නිවේදක- ආ... හරි හරි හරි අර ඉන්නෙ... ආත්මාභිමානයෙන්, හරිම අපූරුයි. ඔව්, මිත්‍රවරුණි, බලන්න අවුරුදු කුමාරයා ශිෂ්ටපුරයට ඇවිල්ලා. ණැනවත්, බුද්ධිමත් ඔබ සැමට ඔහුව හැබැහින් දැකගන්න පුළුවං. ඔව් අපි ප්‍රීතිවෙමු, එතුමා සමඟ ප්‍රීතිවෙමු. අපේ චාරිත්‍රවාරිත්‍ර, ගුණධර්ම පිළිවෙත් මනාව ඉෂ්ට කරමු. ඔව් අපි ප්‍රීති වෙමු.
(ජන ගායනා, රබන් පද ඇසේ)
හුරේ... අවුරුදු කුමාරයා ශිෂ්ටපුරයට වැඩලා, එන්න අපි ප්‍රීතිවෙමු.

(සංගීත හඬ හා දෙබස් හඬ ක්‍රමයෙන් මැකීයයි.)

[උගෙ හිස ඉවරයි- (රේඩියෝ නාට්‍ය- 2006) කෘතියෙනි.]
මේ වියමන ඔබේ මූණු පොතට එක් කරන්න-
Tags- Radio Drama, Radio Katha, Sri Lankan Radio Drama, Radio Drama Scripts, Malaka Dewapriya, Uge Hisa Iwarayi (2006)
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
මාලක දේවප්‍රියගෙන් තවත් වියමන්
රංග
තරුවන් සරණයි [රේඩියෝ කතා අහන්න!]
වෙසෙස්
පරාගයෙන් පුරාණය නොකීම
රංග
පර්යේෂණ ග‍්‍රන්ථකරුවා- [රේඩියෝ කතා]
රංග
රඟ දෙන කපුවෝ- [රේඩියෝ කතා]
රංග
භෂ්මාන්තර- [රේඩියෝ කතා]
තවත් රංග බූන්දි
දෙවියන් බුදුන් මැරී බොහෝ කල්ය! -"මායා බන්ධන"- විචාරාත්මක විමර්ශනයක්
මහගම සේකරගේ නාට්‍ය සාහිත්‍යය සහ ජීවන දෘෂ්ටිය
ඇරිස්ටොෆනීස් -සම්භාව්‍ය කොමඩියේ පියා- සහ ඔහුගේ කෘති
මරණය සහ කන්‍යාවිය මැවූ ඒරියල් ඩෝෆ්මන්
යුරිපිඩීස් චිත්‍රණය කළ ස්ත්‍රීත්වය
බූන්දි නව ඊමේල් ලිපිනය- editorial@boondi.lk
BoondiLets
අන්ද්රේ තර්කොව්ස්කි කියයි.
අධ්‍යක්ෂකවරයාගේ කර්තව්‍යය වන්නේ ජීවිතය ප්‍රතිනිර්මාණය කිරීමයි. එහි චලනයන්, ප්‍රතිෂේදයන්, ගතිකයන්, සංඝට්ටනයන් ප්‍රතිනිර්මාණය කිරීමයි. ඔහුගේ යුතුකම වන්නේ ඔහු අනුදක්නා සත්‍යයේ ලේශ මාත්‍රයක් වුව; එකී සත්‍යය කිසිවෙකු... [More]
What's New | අලුතෙන්ම
අදහස්| ගල්කිස්සේ ප්‍රහාරය: අන්තවාදයේ නරුම මුහුණුවරයි!

2-Mins

(තාරක වරාපිටිය) මේ මොහොත වනතාක් බුරුමයේ හෙවත් මියන්මාරයේ ඇතිවී තිබෙන අර්බුදය යනු සිරියාවේ, ඉරාකයේ හෝ ලිබියාවේ ඇතිවුණු/ ඇතිකළ අරාජිකත්වය තුලින් මතුවූ මුස්ලිම්... [More]
වෙසෙස්| සංචාරක ව්‍යාපාරය, අධිපාරිභෝජනය සහ ශ්‍රී ලංකාව

3-Mins

(සංඛ කිරිඳිවැල) සංචාරක කර්මාන්තය ලෝකයේ ප්‍රමුඛතම කර්මාන්තයක් වන අතරම සීඝ්‍රතාවයකින් වර්ධනය වෙමින් පවතී. එය ඊටත් වඩා සැලකිය යුතු වේගයකින් ලංකාවේ වර්ධනය වෙමින්... [More]
BoondiLets| ෆෙඩ්රික් නීට්ෂේ කියයි.
(සඳකාන්ත) රකුසන් හා යුද වදින්නන්, එ් කාර්යය නිසාම රකුසන් බවට පත් නොවීමට වග බලාගත යුතුය. අැති පමණ කල් අාගාධයක් පතුලට නෙත් යොමා සිටියොත් අාගාධය ද පෙරළා... [More]
අදහස්| [සරදගේ ලියුං හැකින්ස්]- මැතිවරණ කොමසාරිස්ට ජේ.ආර්.ගෙන් ලියුමක්!

2-Mins

අපේ මැතිවරණ කොමිසමේ සභාපති මහින්ද දේශප්‍රිය මගේ හොඳ යාළුවෙක්. නිතර මට කෝල් කරනවා. ‘මැතිවරණත් තියන්නේ නැති එකේ හරි කම්මැලියි බං...... [More]
කතන්දර| "වීර යට්ටෝගේ සහ තෙයූන්ගේ කතන්දරය"- රුසියානු ළමා කතන්දරය [වීඩියෝව]

18-Secs

පොඩිත්තන්ට රුසියාවෙන් කතන්දරයක්- නෙන්ත් ජනකතාවක් ඇසුරින් ජාන්නා විටෙන්සොන් විසින් ලියන ලද, ලියනීඩ් ආරිස්තොව් විසින් සිත්තම් කරන ලද, "වීර යට්ටෝගේ සහ... [More]
කරන්ට්ස්| අපේ හුස්ම බිංදුව තියෙන්නෙම උඹ ළඟයි දුවේ!

40-Secs

(තුෂාරි ප්‍රියංගිකා) බඩගින්න නිසා වමනය කළ පාසල් දැරිය ගැබිණියකැයි චෝදනා කොට විදුහල්පතිනිය විසින් ඇය පාසලින් අස් කරයි.
-පුවතක්


කුළියක් කරන් රෑ දාවල පිරිමහලා
දවසට වරක් විතරම විටෙකදි කාලා
දරුවට උගන්නන්නම වීරිය යොදලා... [More]
කවි| මාතෘ වාට්ටුව ඉදිරිපිට මල් පිපුණු සල් ගස

30-Secs

(පද්මිණි ශ්‍රියාලතා ) මායා මව් බිහිකරන විට ලොවට බුදු පුතෙක්
අතු නමා පාත් කර සැනසුවේ සල් ගහක්
මල් නෙළන්නට කියා එක වසරෙ ‍පෙළ පොතක්
කාලයක් දරුවනට පෙන්නුවෙත් සල් ගහක්

මේ මෙතන තිඹිරිගෙයි ඉදිරිපිට රෝහලේ... [More]
අදහස්| ගබ්සාව සහ දෙවියන් වහන්සේගේ සැලැස්ම!

3-Mins

(තාරක වරාපිටිය) "දරුවෙක් උපදිනවා කියල කියන්නේ, දෙවියන් වහන්සේගේ සැලැස්මෙනුයි ජීවිතය උදා වෙන්නේ. එක දරුවෙක්වත් දේව සැලැස්මෙන් පිට ඉපදෙන්නේ නැහැ." යෝජිත ගබ්සා නීති... [More]
ගී කිය(ව)මු| සඳ, හොරෙන්- හොරෙන්- හොරෙන්- බලමු!

4-Mins

(ඩිල්ෂානි චතුරිකා දාබරේ) ප්‍රේමයට රාත්‍රිය මහෝපකාරීවන්නේ යම් සේ ද ශෘංගාරෝද්දීපනයට සඳ සතු කාර්යභාර්ය ද එසේ ම වේ. ළමා ලපටියන් සඳ දකිනුයේ සිය කුටුම්බ... [More]
කතන්දර| සරසවි ශිෂ්‍යයාගේ මරණය

6-Mins

(සහන් කසීර වික්‍රමසිංහ) ප්‍රවෘත්ති සංස්කාරක තුමනි,
සති දෙකකට උඩදි ගෙලවැල ලාගෙන සියදිවි නසාගත් 'කසුන් හේරත්' නම් සරසවි ශිෂ්‍යයාගේ (ශිෂ්‍ය සංගම් නායකයෙක් ලෙස ද... [More]
කවි| ප්‍රේමයක් ඇති වුණේ නෑ!

45-Secs

(භාතිෂ අකලංක සිල්වා) එක ගමේ, ළඟ ගෙවල්,
එක වයස, ඒ වුනත්
කළු කෙල්ලෙ නුඹේ ගැන
කිසිදාක මගෙ හිතේ
ප්‍රේමයක් ඇති වුණේ නෑ!... [More]
කතන්දර| "එඩිසන්ගෙ අම්මා"- ළමා කතන්දරය [වීඩියෝව]

12-Secs

තෝමස් අල්වා එඩිසන් කියන මහා විද්‍යාඥයා ගැන චූටි ටීචර් කියන අපූරු කතාවක්-

Voiced by- Masha Suwani and Nayomi Gunasiri
Script and Animated... [More]
අදහස්| විභාගය ගොඩ යාමට ඥාන පූජාව!

2-Mins

(තාරක වරාපිටිය) ස්ථානය- වේයන්ගොඩ, පත්තලගෙදර බෝධිමංගලාරාමය විහාරස්ථානය
නිමිත්ත- ශිෂ්‍යත්ව විභාගය වෙනුවෙන් පෙනී සිටින සිසු-සිසුවියන් හට උසස් ප්‍රතිඵල ලබා ගැනීම උදෙසා පවත්වනු ලබන විශේෂ... [More]
අදහස්| [සරදගේ ලියුං හැකින්ස්]- සිරිසේන මහත්තයාට ලියා ඔප්පු කරන වග නම්...,

2-Mins

සෑර්,

සෑර් කැකිරාව පැත්තේ ඇවිල්ල කුඹුරු ටිකක් එහෙම හාලා දීලා, මදිවට වගා සංග්‍රාමයක් එහෙමත් පටන් ගන්නව කියල ආරංචියක් ආව. ආසාවේ උහුලගන්ඩ... [More]
කවි| පටාචාරා

1-Mins

(ප්‍රියලාල් කොග්ගලගේ) සැවැත් නුවරත් නොවෙයි, සිටු කුලේකත් නොවෙයි පටාචාරා ඉපදුණේ
බුදුන් වැඩියත් රජුන් නොවඩින ඈත දුර මහියංගණේ
ඈ කැටුව ආ දාසයා වෙමි ඉපිද ඈ පිළිබඳ සෙනේ
අතු පැහීමයි ගෙඩි කැඩීමයි දත් එකම ශිල්පය වුණේ

පුතෙකු වැදුවා, දුවක වැදුවා මමත් පොඩි අතුපැලක් හැදුවා... [More]
රංග| දෙවියන් බුදුන් මැරී බොහෝ කල්ය! -"මායා බන්ධන"- විචාරාත්මක විමර්ශනයක්

10-Mins

(ප‍්‍රනීත් චානක මුරමුදලිගේ) වත්මන

පරමාදර්ශී කලාවන්ට කණකොකා හඬන 2017 වැනි යුගයක, තරුණ නාට්‍යකරුවන්ට සෙත්ශාන්තියක් මෙන් වූ ජාතික තරුණ සේවා සභා නාට්‍ය තරඟාවලිය මෙවරත් යම්... [More]
පරිවර්තන| අඳුරු ගොම්මනක කතාව

16-Secs

(ෆතීක් අබූබකර් | මාලතී කල්පනා ඇම්බ්‍රෝස්) මැටි බඳුන
පිරී යයි
මා හෙවත්
පිරියම් නො කළ
වදනින් ...
සිත්තම් කරමි... [More]
කවි| නෙළුමෙහි කුහුඹු මිනිසාට

24-Secs

(දුලන්ජන් විතාරම) වළාකුළු සිඹී ඉහළට නැගුනාම
බලා නෙත් අහස මුදුනේ රැඳුනාම
රවා බලන ඉර තරහින් බැලුවාම
නිවා විඩා දුරලා නුඹ ගනු කෝම

පියාඹන කාක පෙරහැර නිරන්තරේ... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook