Facebook
Twitter
Google+
YouTube
Blog
RSS Feed
රංග බූන්දි
"වෝකින් පාත්"- රෙජිමේන්තුකරණය වෙමින් මානව සබඳතා ක්ෂය වන සමාජයක් පිළිබඳ දේශපාලන කියවීමක්
බූන්දි, 22:48:57
රුවන්ති ඩි චිකේරා විසින් රචිත, ජයම්පති ගුරුගේ විසින් නිෂ්පාදනය කරන ලද නිවදන් රංගයක් වූ "වෝකින් පාත්" (Walking Path), පශ්චාත් යුද සමය තුළ රාඡ්‍ය තන්ත්‍රයේ මූලිකත්වයෙන් බිහි කිරීමට දායක වූ සක්මන් මං තීරු පසුබිම් කරගත් අපූර්වතම නාට්‍ය නිර්මාණයකි. මෙම මං තීරු වල දිවීමේ සහ ඇවිදීමේ නිරත ගැහැණුන් ගේ සහ මිනිසුන් ගේ චර්යාවන් ඉතා තීක්ෂණ ආකාරයෙන් ප්‍රත්‍යවේක්ෂණයට ලක්කරමින් එම මිනිසුන් සහ ගැහැණුන් තම තමන් සමගත් එමෙන් ම සමාජ දේශපාලන අධිකාරිත්වයත් සමගත් ගනුදෙනු කරන කරන ආකාරය නාට්‍යයේ අන්තර්ගතයට ඇතුලත් වේ.

නාගරික අලංකරණයේ අංගයක් ලෙස නිර්මාණය වූ ව්‍යායාම මං තීරු, එහි අත්‍යයන්ත අංගෝපංග, ඒවා හි පාලන අධිකාරිත්වය සහ එහි සැරිසරන ගැහැණුන් සහ මිනිසුන් ගෙන් නාට්‍ය නිර්මාණකරුවෝ (මෙතැන් පටන් නිර්මාණකරුවන් යන යෙදුම නාට්‍ය රචිකාව සහ නාට්‍ය නිෂ්පාදකයා හැඟවීමට පාවිච්චි වේ) සිය රංග පරිසරය සකසා ගනිති.

ප්‍රථම ජවනිකාවේ දී වේදිකාවට එළබෙන නඑ නිළියෝ පළමු ව වෙඩි හඬින් බියපත් ව දෙවනු ව යුද සමයක අවසානය සනිටුවහන් කෙරෙන මල් වෙඩි හඬින් ප්‍රමුදිත වෙති. වේදිකාව මත සිටින මෙම මිනිස්සු සහ ගැහැණු පාවෙන බැලූනයන් සමග පැමිණෙන සෝල්දාදුවන් සමග විවිධ අභිනයන්ගෙන් සුසැදුනු සමූහ ඡායාරූපයකට පෙනී සිටිති. කෙමෙන් ව්‍යායාම මං තීරු සහ විවේක සුවයෙන් ගත කිරීමට සාදන ලද බංකු වේදිකාව මත ප්‍රාදුර්භූත වේ. මෙතැන් පටන් වදන් වලින් තොරව සාම්ප්‍රදායික නාට්‍යයක සමන්විත අඛණ්ඩ කතා වස්තුවක පදනම් නොවී කෙටි අනුක්‍රමික ජවනිකා දාහතකින් නාට්‍යකරුවා ඇවිදින මං තීරු වල දුවන ගැහැණුන් ගේ සහ මිනිසුන් ගේ ජීවිත ප්‍රේක්ෂකයා ඉදිරියේ විදාරණයට ලක් කරයි.

ඇත්ත වශයෙන් ම මෙම මං තීරු වල දුවන්නෝ කවරහු ද? බහුතරය මධ්‍යම පන්තිය සහ ඉහළ මධ්‍යම පන්තිය නියෝජය කරයි. සුඑතරයක් මං තීරු සකසන්නට පෙර සිට ම සෞඛ්‍ය සම්පන්නව ජීවත් වීමේ අභිලාෂයෙන් හෝ ශාරීරික ශක්තිය වැඩි කරගන්නට දිවූ අය යි. සමහරෙක් ශරීරය ස්ථූල වීම කරණ කොට ගෙන නොයෙකුත් ව්‍යාධින් වලට භාජනය වේ යැයි සිතා මරණිය භයින් දුවති. සමහරුන් ඉතා මිල අධික ලෝ සුපතල සන්නම් සහිත ක්‍රීඩා ඇඳුම් ආයිත්තම් ඇඳ පැළැඳ හාත්පස සිසාරා හමන සුවඳ විළවුන් ගල්වා, අනේකවිධ රන් අභරණ පළදා ඇවිදීමට සහ දුවන්නට පැමිණෙති. සමහරෙක් දුරකථන ඇමැතුම් ගනිමින්, කන්යොමුවන් පළදා ගීතයන් ට සංගීතයන් ට සවන් දෙමින් දුවමින් සහ ඇවිදිමින් සිටිති. මෙම සක්මන් මං තීරු පාවිච්චි කරන්නන් ගේ සමාජ තත්වයන් පිළිබඳ සාමාන්‍ය අවබෝධයක් ඔවුන් ගේ වාහන නවතා ඇති රථ ගාල් දෙස බලා ලබාගත හැකිය. අධි සුඛෝපබෝගී වාහන කීපයක් ඇති, සාමාන්‍ය මට්ටමේ වාහන වැඩි සංඛ්‍යාවක් දැකිය හැකි මෙම රථ ගාල් වල ත්‍රීවීලර් සහ මෝටර් සයිකල් ද අඩු සංඛ්‍යාවකින් දැකිය හැකි වේ. විශේෂයෙන් සති අන්තයන් හි මෙම මං තීරු වල සිය පවුලේ ළමා ලපටීන් කැටුව විවේක සුවයෙන් ඇවිදින්නන්ගෙන් පිරී යයි.

වෝකින් පාත් නාට්‍යය වේදිකාව මතට ගෙන එන්නේ මෙම ජන කණ්ඩායමේ වල හරස්කඩයකි, නාටකීය නියෝජනයකි.

මිනිස්සු සහ ගැහැණු තමන් ලද නිදහස භුක්ති විදිනු වස් මෙම මං තීරු මතට වී ව්‍යායාම කරති. එකිනෙකා දෙස කුතුහලයෙන් බලති. මානව සබඳතා ඇති කරගැනීමට වෙර දරති. පෙම්වත්තු මං තීරු වල සැහැල්ලුවෙන් ඇවිද යති. එහෙත් ඔවුන් තමන් කැමැති පරිදි ආලයෙන් වෙළී එකිනෙකාට සමීපව ගත කිරීමට උත්සාහ කරන ක්ෂණයෙන් විසිල් හඬක් ඇසේ. විමතියට පත්වන ඔවුහූ නැවතත් තම රුචිකර වූත් සහ හික්මුණු බවින් යුතු වූත් ආලිංගන ඉරියව්වට පැමිණීමට තැත් කරති. නැවතත් කන් බිහිරි කරන විසිල් හඬ ඇසේ. ගැහැණුන් සහ මිනිසුන්ට මං තීරු පාවිච්චි කළ හැකි ය. එහෙත් ඒවා පාවිච්චි කරන ආකාරය තීරණය කරන්නේ ඔවුන් නොවේ. ඔවුන් ගේ චර්යාව අතිවිනයනයකට රෙජිමේන්තුකරණයකට භාජනය වන බව පෙනේ. සම්මුති සහ සම්මුති විරෝධී චර්යාව තීරණය කරන්නෝ එම ගැහැණු සහ මිනිස්සු නොවෙති. එය තීරණය කරන්නේ නිලබල සහිත මං තීරු පාලන අධිකාරිය යි.

තවත් ජවනිකාවක බංකුවක් මතට එන නඑවෙක් නිසොල්මන් සිංහ පිළිරුවක වෙස් ගනී. එහි පැමිණෙන සක්මනෙහි යෙදී සිටින්නෝ ඔවුන් ගේ විඩාව නිවා ගැනීමට හෝ වෙනත් වැඩක යෙදී සිටීමට එය මත අසුන් ගනිති. එයින් කෙනෙකු සිංහ පිළිරුවට හේත්තු වීම ට උත්සාහ ගතහොත් හෝ පරිගණකයක් සමග වැඩ කිරීමට පටන් ගතහොත් හෝ දුම්වැටියක් දැල්වීමට තැත්කළහොත් සිංහ පිළිරුව ගෙරවීමට පටන් ගනී. විමතියට පත්වන ගැහැණු සහ මිනිස්සු තම හැසිරීම් සිංහ පිළිරුව විසින් අනුමත නොකරන බව වටහා ගනිති. මං තීරු වල අලුතින් පිහිටුවන ලද නිර්ජීව එහෙත් සංකේතාත්මකව බලය පතුරුවන පිළිරූ පවා ස්වාධීන තීරණ ගැනීමට හැකි මිනිසුන් සහ ගැහැණුන් නිර්වින්දනයට ලක් කර ඇති සේ ය.

අද්‍යතන සමාජය තුල මානව සබඳතා කෙතරම් ව්‍යාජත්වයට පත්ව ඇත්දැයි පිළිබිඹු කෙරෙන තවත් ජවනිකාවක් මගින් මං තීරු වල ඇවිදින ගැහැණුන් සහ මිනිසුන් තම ජංගම දුරකථන සමග ගත කරන ජීවිතය නිරූපනය කරයි. මෙම මිනිස්සු සහ ගැහැණු එකිනෙක සමීපයෙහි ම වෙසමින් ඔවුනොවුන් සමග ම කෙටි පණිවුඩ හුවමාරු කරගනිති. ජංගම දුරකථන සමග සිනාසෙති. ජංගම දුරකථනයෙන් තමන්ගේ ම ඡායාරූප ගෙන තම අසල ම සිටින්නන් සමග ම හුවමාරු කර ගනිති. එක් අයෙක් තම හුදෙකලාව දරා ගත නොහැකි ව විලාප දෙමින් හඬයි. ඊළඟ මොහොතේ ඔහු තම ඇඬිමේ ඉරියව්ව ඡායාරූප ගත කොට අනෙත් අයට යවයි. ඔවුහූ එයින් මහත් සන්තුෂ්ටියට පත්ව කෙටි පණිවුඩ වලින් ඔහුට ප්‍රශංසා කරති. මෙම සියලු මිනිස්සු සහ ගැහැණු ඔවුනොවුන්ගෙන් පමණක් නොව තම තමත්ගෙනුත් පරාරෝපිත වී සිටිති. කරුණාබරිත හදවත් වලින් විනිර්මුක්ත වී සිටිති. අධ්‍යාත්මික සබඳතාවන් ක්ෂය වී ගොස් ය.

වදන් වලින් තොර අන්තර්ගතයෙන් එකිනෙකට වෙනස් ජවනිකා වලින් සමන්විත මෙවන් නාට්‍ය නිර්මාණයක් මගින් ප්‍රේක්ෂකයා අනුක්‍රමිකව උච්චස්ථානයක් කරා ගෙන ගොස් ඔහු හෝ ඇය භාවමය සහ බුද්ධිමය වශයෙන් කම්පනයකට පත් කිරීම බෙහෙවින් අසීරු කටයුත්තකි. මෙම නාට්‍යයේ අවසන් ජවනිකාව ඉන් පෙර ජවනිකා සියල්ල අතික්‍රමණය කරමින් ප්‍රේක්ෂකයා කූටප්‍රාප්තියක් කරා ගෙන යෑමට උත්සාහ දරයි.

එම ජවනිකාවෙන් නිරූපණය වන්නේ නාට්‍ය විකාසනය ඇතුළත පරිපූර්ණව සංවාදයට බඳුන් වන අධිකාරිත්වය, රෙජිමේන්තුකරණය ප්‍රශ්න කිරීමට ලක්කරන්නන් ගේ ඉරණම යි.



මං තීරු වල ඇවිදින්නන්ගෙන් එක් අයෙක් රොබෝවරුන් මෙන් යාන්ත්‍රිකව ඇවිදින දුවන අය නවතන්නට තැත් කරයි. ඔහුට දුවන්නන් වාලේ දුවන සමස්ත ජන කණ්ඩායම ම සමාජ දේශපාලන යථාර්ථයන්ගෙන් විකේන්ද්‍රනය වී ඇති බව වැටහී ඇති සේ ය. ඔහු ඔවුන් ව විරුද්ධ දිශාවට තල්ලු කරයි. දුවන්නෝ ඔහුට අනුගත වී එක තැන දුවමින් කෙමෙන් පසු පසට තල්ලු වෙති. එහෙත් එසැණෙනින් වේදිකාවට පැමිණෙන මං තීරු ආරක්ෂකයෝ ඔහු පසෙකට ඇද දමා ඔහුට දරුණු ලෙස පහර දීමට පටන් ගනිති. අනෙක් සියල්ලෝ අකර්මන්‍යව දෑස් අයා බලා සිටිති. පහර කෑමට ලක් වූ පුද්ගලයා හුස්ම ගැනීමට අපහසුවෙන් වේදිකාව මත දඟලයි. අවසානයේ ඔහු ගේ සහායට බලා සිටින්නන් ගෙන් දෙදෙනක් පැමිණෙති. වෙඩි හඬවල් දෙකක් ඇසේ. ඔවුන් දෙදෙනා බිම ඇද වැටෙති.

තනි ආරක්ෂකයෙක් බැලූන පොකුරක් සමග වේදිකාවට පැමිණේ.

තුෂ්ණීම්භුතව සිටි දුවන්නෝ කැළඹීමට පත්ව ඔවුහූ දුවමින් සිටි දිසාවට ම දුවන්නට පටන් ගනිති. අවසානයේ පහර කෑමට ලක් වූ තැනත්තා මහත් වෙහෙසක් ගෙන වේදිකාව මත සිට ගනියි. ඉන්පසු ඔහු වේදිකාව මතින් 'නිවැරැදි' දිශාවට දුවන දුවන්නන්ට එකතු වේ.

මේ සියල්ලන් මැද තම බැලුන් පොකුර ද අතැතිව ආරක්ෂකයා වේදිකාව මත අරක් ගෙන සිටී. වේදිකා තිරය සෙමෙන් වැසී යයි.

මෙම නාට්‍ය නිර්මාණකරුවන්ට අලුතින් ඉදිකරන ලද මං තිරු සහ එහි සැරිසරන ගැහැණුන්, මිනිසුන් සහ ඔවුන් ගේ චර්යාව යාන්ත්‍රිකව හසුරුවන අධිකාරවාදී ආරක්ෂක කණ්ඩායම අද්‍යතන සමාජ දේශපාලන යථාර්ථයේ සංකේතාත්මක සංරචකයන් පමණි. ඔවුන්ගේ විශ්ලේෂණයට ලක්වන්නේ පශ්චාත් යුද සමය තුල බිහි වූ සක්මන් මං තීරු නොවේ. ඔවුන් තම ප්‍රතිභා චක්ෂුසෙහි ආලෝකය විහිදුවන්නේ මෙම මං තීරු වල ඇවිදින දුවන මිනිසුන් පිළිබඳවයි. ඔවුන් ගේ මානව සබඳතාවන් වල අතෘප්තිමත්භාවය සහ අරාජිකත්වයයි. සුපසන් මානව සබඳතා ඇතිකරගැනීමට පිළිමල් වන සමාජ ව්‍යුහයන් පිළිබඳව යි.

මෙම නිර්මාණය හරහා විවිධ දිශාවන් ට එල්ල වූ ප්‍රශ්න මතුවේ. මෙම මං තීරූ වල සැරිසරන ජනයාට පමණක් නොව එම මං තීරූ වල නොසැරිසරන ජනයාට වී ඇත්තේ කුමක් ද? ඔවුන් වර්තමානයේ සමාජ සංචලනයන් පිළිබඳ දැනුවත් ව ඒවා පිළිබඳ ජන කණ්ඩායමක් ලෙස සංවේදී සම්පර්කයන්ට එළඹ සිටී ද? එසේ නැතහොත් තනි තනි පුද්ගලයන් සහ කණ්ඩායම් වශයෙන් සමාජයෙන් පරාරෝපිත වී බල අධිකාරිත්වය මගින් මෙහෙයවන රූකඩ සමූහයක් බවට පත්ව ඇත් ද? සමාජ අසාධාරණයන්ට එදිරිව තමන් නිවැරැදි යැයි සිතන මං තීරූවක යෑමට ඔවුනට ඇති ජවය ඔවුන්ගෙන් උදුරාගෙන ඇත් ද? දිනෙන් දින රෙජිමේන්තු ගතවන මිලිටරිකරණය වන සමාජය ජීවත්වීමට සිදුවීමේ අභාග්‍යයෙන් මිදීමට කළහැකි යමක් ඇති ද? නාට්‍ය වේදිකා තිරය වැසී යන්නේ මෙවන් ප්‍රශ්ණ ප්‍රේක්ෂකයාගේ මනසෙහි ඉතිරි කරමිනි.

මෙම නාට්‍යයේ සමස්ත නළු නිළියන්ගේ ඇඳුම් පැළදුම් සහ සියලු වේදිකා භාණ්ඩ සුපිරිසුදු ශේවේත වර්ණ ගන්වා ඇත. මෙම ඒකරූපතාව මගින් නාට්‍ය නිර්මාණකරුවන් අපේක්ෂා කරන්නට ඇත්තේ දෙබස් වලින් තොරවීමේ අභියෝගය තවත් තලයකට ගෙන ගොස් ප්‍රේක්ෂක අවධානය සාකල්‍යයෙන් ම අභිනයෙන් කෙරෙන අර්ථ ගැන්වීම් වලට පමණක් ප්‍රේක්ෂක අවධානය යොමු කිරීම විය හැකි ය. එහෙත් එයින් වෙහෙසට පත්වන ප්‍රේක්ෂකයා නාට්‍යයේ එකාකාරීත්වයේ ග්‍රහණයට හසු වේ. එමෙන් ම සමහර ජවනිකා වල අර්ථය මැනවින් වටහා ගැනීමට සමත් සූක්ෂම අභිනයන් ඉදිරිපත් කිරීමට නිරූපිත නාට්‍ය ජවනිකා අසමත් වීම නිසා රස භංග වේ. සමහර ජවනිකා ඉතා සරල අර්ථ ජනනය කරන බැවින් ප්‍රේක්ෂක අවධානය හීන වේ.

අත්හදාබැලීමක් ලෙස හෝ කලා වාරණයෙන් අත්මිදීමට හෝ මෙම නිර්මාණකරුවන් විසින් භාවිත කරන ලද නවමු නාට්‍ය තාක්ෂණය පිළිබඳ සහවේදනාත්මකව අදහසක් මතු කිරීම වැදගත් යැයි සිතේ. සංකීර්ණ සමාජ ව්‍යුහයන් සහ එම සමාජ ව්‍යුහයන් සමග ගැටෙන මානව සබඳතාවන් පිළිබඳ කලා නිර්මාණයන් හි නිරත වන නාට්‍යකරුවන්ට, නිවදන් නාට්‍ය තාක්ෂණය ප්‍රමාණවත් ද? වදන් වලින් තොර වීම සංකීර්ණ මානව හැඟීම් ප්‍රකාශනයට බාධාවක් ද? මෙවන් නාට්‍ය තාක්ෂණයක් මගින් ප්‍රේක්ෂකයා සහ වේදිකාව අතර අනුවේදනීය සහසම්බන්ධයක් ගොඩනැඟිය හැකි ද? සමාජ යථාර්ථය ග්‍රහණය කිරීමේ කලාත්මක විධික්‍රමයක් ලෙස මෙවන් ආකෘතියකට ඇති ශක්‍යතාවන්ගේ සීමාවන් කවරේ ද?

මෙම ප්‍රශ්න මතු කිරීමට මූලික වශයෙන් හේතුකාරකවන්නේ නාට්‍යයේ තේමාව පිළිබඳව මෙන් ම එහි සිද්ධිදාමයන් සහ තමන් අතර ඇති අවියෝජනීය සම්බන්ධය පිළිබඳ ප්‍රේක්ෂකයා භාවමය සහ බුද්ධිමය වශයෙන් කම්පනයට පත් වී ඇති දැයි විමසා බැලිම සඳහා ය. මෙම විමංසාවේ රචකයා ගේ අදහස නම් මෙම නාට්‍යයේ අත්හදාබැලූ තාක්ෂණයේ සීමාවන් නිසා එවන් ගැඹුරු කම්පනයක් ප්‍රේක්ෂකයා තුල සිදු නොවූ බවයි.

මෙම නාට්‍යය නරඹන විට රචකයාගේ මතකයට පැමිණියේ ධනංජය කරුණාරත්න විසින් මෑතක දී නිෂ්පාදනය කරන ලද "දුවන උන් දෙන්නෙක්" නම් කෙටි නාට්‍ය නිර්මාණයයි. ධනංජය සිය දෙබස් සහිත නාට්‍යයේ නොමැරී සිටීමට දුවන ඉහල පැලන්තියේ පොහොසතකු පිළිබඳ සහ ඔහු පසුපසින් ඔහු ගේ සහයට වතුර බෝතල් සහ අනෙකුත් ආම්පන්න රැගෙන දුවන අසරණ මිනිසෙකු ගේ කථා පුවතක් ගෙන හැර දක්වයි. ඔහු නඑවන් දෙදෙනකු පමණක් භාවිත කරමින් අද්‍යතන සමාජ අසාධාරණයන් පිළිබඳ ප්‍රේක්ෂකයා තුල ප්‍රබළ කම්පනයක් දනවයි. මෙම නිදසුන ගෙන හැර දැක්වූයේ වෝකින් පාත් නාට්‍යයේ සාධනීය සහ සාධනීය නොවන අංශ පිළිබඳ සංසන්දනාත්මක විනිශ්චයක් දීමට නොව නාට්‍යයක් නරඹා ප්‍රේක්ෂකයා තුල ඇතිවිය යුතු ප්‍රබල භාවමය සහ බුද්ධිමය කම්පනයක අවශ්‍යතාව පිළිබඳ අවධාරණය කිරීම සඳහා පමණි.

නාට්‍ය රසය හීන වීමට බලපාන එවන් වැදගත් ව්‍යුහමය ප්‍රශ්න තිබුණ ද සමස්තයක් වශයෙන් ගත් කල මෙම නාට්‍යයේ නිර්මාණකරුවන් වන ජයම්පති සහ රුවන්ති නව සම්පරීක්ෂණාත්මක විධි ක්‍රමයක් ලෙස වදන් වලින් තොර සත් කලා කෘතියක් නිර්මාණ කිරීමට දැරූ තැත නොමද ප්‍රශංසාවට ලක් කළ යුතු ය.
වෙනත් සබැඳි |
Walking Path- More than walking
මේ වියමන ඔබේ මූණු පොතට එක් කරන්න-
Tags- Walking Path, Sri Lankan Drama, Jayampathi Guruge, Ruwanthi De Chikera
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
උපාලි අමරසිංහගෙන් තවත් වියමන්
Cine
"තුන්දෙනෙක්|மூவர்"- මිනිස්කම අහිමි වීම පිටුපස ඇති දේශපාලන ප්‍රශ්නය නිරාවරණය කිරීමේ අභියෝගය
Cine
ශ්‍රී ලංකාවේ සෙල්විලාගේ සහ සරත්සිරිලාගේ ප්‍රශ්නය නොහොත්, "ඔබ නැතුව ඔබ එක්ක"
Cine
අධිකරණයේ මුනිවත සහ පාරාදීසය සොයා
රංග
පෙම් යුවළක් ඕනෑ කර තිබේ...!
රංග
ඇසිඩ් වැස්ස- මායාට නොලැබී අපට ලැබුණු ජීවන ලාලසාව
තවත් රංග බූන්දි
'පක්ෂීහු'- ඇරිස්ටොෆනීස්ගේ යුතෝපියානු සිහිනය
ග්‍රීක නාට්‍යයන්හි ගැබ්වන සියුස් බල විරෝධය
දේශපාලන සංස්කෘතියේ අඳුරු ප‍්‍රපාතයක් වෙත එබී බලන, "ප‍්‍රපාතය ළඟ වනස්පතිය"
හිනාව ගිලිහුණු සමාජයට "හිනාවෙලා මිනිත්තුවක්"
දෙවියන් බුදුන් මැරී බොහෝ කල්ය! -"මායා බන්ධන"- විචාරාත්මක විමර්ශනයක්
BoondiLets
අකිර කුරොසව කියයි.
සිනමාකරුවෝ, පොදුවේ සියළු නිර්මාණකරුවෝ කිසිදා තෘප්තිමත් නොවන්නෝ ය. ඔවුන් නොනවත්වා ම වැඩ කරන්න්නේ එහෙයිනි. මෙතරම් කලක් නිර්මාණකරණයේ යෙදෙන්නට මට හැකිවූයේ මා සැම විටම "ඊගාව සැරේ... [More]
What's New | අලුතෙන්ම
Cine| අසන්ධිමිත්තා- වෘත්තයෙන් ආපස්සට

3-Mins

(ඩිල්ෂානි චතුරිකා දාබරේ) සාහිත්‍යය හෝ සිනමාපට තවදුරටත් සාම්ප්‍රදායික ආකෘතියම නොපතයි. රසවිඳින්නන්ව සාමාන්‍ය කතාවකින් නළවාදැමීමට නොහැකිය. තවදුරටත් ඔවුහුද හුරුපුරුදු නිර්මාණ ස්වභාවයම නොපතති. නිර්මාණකරුවකු... [More]
Cine| රාමු තුළ යළි රාමු වුණු "දැකල පුරුදු කෙනෙක්"

6-Mins

(විකුම් ජිතේන්ද්‍ර) මේ යුගය ඡායාරූප හා කැමරා යුගයක් වන අතර වෘත්තීය හෝ අර්ධවෘත්තීය කැමරා භාවිත කරන ආධුනිකයා පවා අධි සුන්දරත්වයෙන් යුතු ඡායාරූප... [More]
අදහස්| To Sir, With Love!

2-Mins

(තාරක වරාපිටිය) To Sir With Love යනු මීට වසර 28 කට පමණ ඉහතදී කළු සුදු ටෙලිවිෂන් තිරයකින් මා බැලු චිත්‍රපටයකි. එය එතෙක්... [More]
වෙසෙස්| මැදියම් රැයේ වාහනවලට අතවනන සුදු හැඳි ගැහැනිය

5-Mins

(තිලක් සේනාසිංහ ) අද මෙන් මහජනයා හෝ රථවාහන බහුල නොවූ මීට දශක හය හතකට පෙර ඇතැම් දිනවල මැදියම් රැය ආසන්නයේ දී කොළඹ බොරැල්ලේ... [More]
ඔත්තු| හෙල්මලී ගුණතිලකගෙන් 'සහස් පියවර'

5-Secs

හෙල්මලී ගුණතිලක විසින් රචිත පළමු කෙටිකතා එකතුව වන 'සහස් පියවර' කෘතිය මුද්‍රණද්වාරයෙන් එළි දක්වා තිබේ.... [More]
පොත්| ඉණෙන් හැලෙන කලිසමක් රදවා ගන්න තතනමින්...

2-Mins

(රෝහණ පොතුලියැද්ද) පුද්ගල නාමයක්, වාසගමක් දුටු කල්හි ඔහුගේ ජාතිය/ ආගම/ කුලය/ ලිංගය/ ග්‍රාමීය, නාගරිකබව සිතියම් ගත කිරීම සාමාන්‍ය පුරුද්දක්. නමුත් "ඩොමිනික් චන්ද්‍රසාලි"... [More]
කෙටියෙන්| මොන එල්ලුං ගස් ද?

10-Secs

(සුරත්) කුඩුකාරයෝ ටික විජහට එල්ලාලා
බේරා ගනිමු රට ඒකයි හදිස්සිය
මෙත්පල් මැතිඳු මුර ගානා හැටි දැකලා
ගිරවා මගේ දුන්නා එල ටෝක් එකක්

"එල්ලිය යුතු එවුන් දා ගෙන රෙදි අස්සේ... [More]
පොත්| උමතු වාට්ටුවට අප්පචිචී ඇවිත්!

6-Mins

(කේ.ඩී. දර්ශන) 'උඹට එහෙම යන්න බැහැ උඹ ඉන්න ඕනෙ මම ළඟ. මගේ හෙවණැල්ලෙන් මිදෙන්න උඹට බැහැ.'
(-41 පිට)

'මම ගල් ගැහී අප්පච්චී දෙස බලාගෙන... [More]
රත්තරං ටික| මෙන්න බත් කූරෙක්!

28-Secs

මත්සුවා බැෂෝ යනු කෘතහස්ත ජපන් කවියෙකි. බැෂෝගෙ කවිකාර කම දැක දිනක් ඔහුගේ ශිෂ්‍යයෙකු ද කවියක්... [More]
කවි| ජානූ! පේ‍්‍රමයෙන් විතැන් විය හැකි දැයි මට කියන්න

24-Secs

(තුෂාරි ප්‍රියංගිකා) එකින් එක මතක අහුලමි
මංජුසාවකි හදවත මතක අහුරමි
සීත හිමයේ මිදුණු හිමකැටිති යට
ඔබට කවි ලියා සඟවමි
ජානූ!
පසුපස සෙවණැල්ල සේ ඇදෙමි... [More]
පොත්| සෞන්දර්යය වෙනුවට කටු අතු- අපේ යුගයේ උරුමය!

13-Mins

(චූලානන්ද සමරනායක) කිවිඳියකගෙ කාව්‍ය ග‍්‍රන්ථයක් එළිදක්වන මොහොතක ඇගේ කවියට ප‍්‍රවේශ වෙන්න වඩාම සුදුසු මාවත මොකක්ද? මේක ටිකක් විසඳගන්න අමාරු ප‍්‍රශ්ණයක්. මොකද අද... [More]
ඔත්තු| 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්'- දෙසැ. 01

11-Secs

මාලතී කල්පනා ඇම්බ්‍රෝස්ගේ 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්' කාව්‍ය... [More]
වෙසෙස්| වාලම්පුරි- වාසනාව, විහිළුව සහ මිත්‍යාව

1-Mins

(තාරක වරාපිටිය) ලංකාවේ ඉහළ "අලෙවි වටිනාකමක්" ඇති, ‘අනුහස් ඇති’ ගුප්ත වස්තුවකි වාලම්පුරිය. මෙම ‘වටිනාකම’ තීරණය වන්නේ එහි ඇති ද්‍රව්‍යමය වටිනාකම හෝ වෙනත්... [More]
පොත්| "මතක වන්නිය" හෙවත් උතුරේ ශේෂ පත්‍රය

3-Mins

(සුරෝෂන ඉරංග) කලා කෘතියකින් භාවමය කම්පනයක් ඇතිකළ හැකි නම් එයට කිසියම් සමාජ බලපෑමක් සිදුකළ හැකිය. එසේ කම්පනයත්, පශ්චාත්තාපයත් ජනිත කළ, දමිළ බසින්... [More]
අදහස්| විද්‍යාවේ සියවසක පිම්ම!

2-Mins

(තාරක වරාපිටිය) පසුගිය සියවසේ මිනිස් ශිෂ්ඨාචාරය මුහුණපෑ ප්‍රධාන මාරක අභියෝග තුන වුයේ වසංගත, සාගත හා සංග්‍රාමයන්ය. ඒ සියවස තුල එසේ ඉන් මියැදුන... [More]
කරන්ට්ස්| "අඟ"

19-Secs

(උපුල් සේනාධීරිගේ) අංඟ පුලාවකට නැති මිනිස්සු
තම හිස අත ගෑහ
අඟක්... ඔව් අඟක්
රයිනෝසිරසක හැඩගත් අඟක්
මොළයක් නැති සිරසක්
තෙතක් නැති හදවතක්... [More]
වෙසෙස්| ඇනා කැරනිනා සහ ඇනා ස්ටෙපානොව්නා

7-Mins

(ඩිල්ෂානි චතුරිකා දාබරේ) ලියෝ තෝල්ස්තෝයි විරචිත ඇනා කැරනිනා නවකතාවේ ප්‍රධාන කථා නායිකාව වන ඇනා අර්කෙඩියෙව්නා කැරනිනා නමැති චරිතය ගොඩනැංවීම සඳහා තෝල්ස්තොයිට කාන්තාවන් කිහිප... [More]
පරිවර්තන| යෑම සහ ඒම අතර

20-Secs

(ඔක්තාවියෝ පාස් | නිලූක කදුරුගමුව) තම විනිවිද පෙනෙනබව සමඟ
ආලයෙන් බැඳුණු දහවල
අවිනිශ්චිතව ටැග්ගැහෙයි
යෑම සහ නැවතීම අතරමැද.
මුළු ලෝකයම නිසලව නැලැවෙන
මුහුදු බොක්කකිය දැන් වටකුරු පස්වරුව.... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook