Facebook
Twitter
Google+
YouTube
Blog
RSS Feed
රංග බූන්දි
'එකම මිනියට වැඩිම වැන්දඹුවන් ඉන්න රට'- දහස් ගණන් වැන්දඹුවෝ
බූන්දි, 16:32:02
නැඟී එන ධනේශ්වරයේ නොනවතින සම්පත් සොයා යාමේ අභිලාෂය නිසා රන් ආකරයක් වූ චිලී දේශය යුරෝපීයන්ගේ (ස්පාඤ්ඤ) යටත් විජිතයක් බවට පත් විය. රුධිර ගලනයන් ගණනාවකින් අනතුරුව 1821 දී එය ජනරජයක් විය. එහි අග‍්‍ර ඵලය වූයේ 1970 දී සැල්වදෝර් අයියන්ඩේගේ නායකත්වයෙන් යුතු සමාජවාදී පාලන තන්ත‍්‍රයයි. එසේ වුව ද ඇමරිකානු අධිරාජ්‍යවාදී කුමන්ත‍්‍රණයකින් පසු චිලී දේශය පිනෝචේ නම් හමුදා නිලධරයාගේ කුරිරු ඒකාධිපතිත්වයට හසුවිණි. ඒරියල් ඩෝෆ්මන්ගේ ‘Widows’ නාට්‍යය මේ ඒකාධිපති හමුදා පාලනයේ පිළිබිඹුවකි.

"දහස් ගණන් වැන්දඹුවෝ" නමින් මෙවර කැලණි සරසවි නාට්‍ය උළෙලේ දී රඟ දැක්වුණු නාට්‍යය ඉංග‍්‍රීසි සාහිත්‍ය පිළිබඳ බහු පඨිතයෙක් වන ලක්ෂ්මන් ප‍්‍රනාන්දුගේ පරිවර්තනයකි. මෙය ම මීට පෙර සිරිල් සී පෙරේරා විසින් පරිවර්තනය කරන ලදුව ජෙරොම් ද සිල්වාගේ අධ්‍යක්ෂණයෙන් "ආයෙත් එන්නෙ නෑ" නමින් රංග ගත වී ඇත. අපගේ කෙටි විමසුම මින් පළමුව සඳහන් කළ කැලණි සරසවි නිෂ්පාදනය පිළිබඳව යි. එහි අධ්‍යක්ෂණය සංජීව ගුණරත්නගේ ය. නිෂ්පාදනයක් ලෙසින් පූර්ණ සාර්ථකත්වයට ළඟා වී නොතිබුණ ද විමසිය යුතු කාරණා කිහිපයක් ම නිසාවෙන් පෙළ පක්ෂයට වැඩි අවධානයක් යොමු කරමින් දහස් ගණන් වැන්දඹුවෝ විමසුමට බඳුන් වේ.

පිනෝචේ නම් ඒකාධිපති හමුදා පාලකයාගේ සමයේ ප‍්‍රචණ්ඩත්වයට ගොදුරු වූ ගමක් පිළිබඳව කියවෙන දහස් ගණන් වැන්දඹුවෝ නාට්‍යය මෙරට සමාජ තතු හමුවේ ද විමසිය හැකිය. කස්තෝරියෝ නම් ඉඩම් හිමි රදළයා ගම් වැසියන්ගේ ඉඩම් උරුමය ඔහුගේ යටතට ගත් පසු ගම්මු කස්තෝරියෝගේ වහල්ලු මට්ටමට වැටුණහ. එක් පිරිමි ළමයෙක් හැරෙන්නට ගමෙහි වූ සියලු පිරිමි පැහැරගෙන යනු ලැබිණි. සිය පියවරුන්, සැමියන්, දරුවන්, සහෝදරයන් එනතෙක් ගං ඉවුරට වී බලා සිටින වැන්දඹුවන්ගේ සෝ සුසුම් නාට්‍යය පුරාවට ඇසෙයි. සිය සමීපතමයන් සප‍්‍රාණිකව නොඑන බව දැනගත්තෝ මළ මිනී පාව එනතුරු ගං ඉවුරට වී සිටියහ. හඳුනා ගත නොහැකි තරමට ම විරූප වූ මෘත දේහ වෙනුවෙන් වැන්දඹුවෝ එකිනෙකා හා අරගල කරති. ප‍්‍රදේශයේ පාලනය භාර මිලිටරිය හා හැපෙන්නට යාමෙන් තත්ත්වය තව තවත් උග‍්‍ර වේ. මේ පුවත සියුම් සංවේදනා දනවන ආකාරයෙන් නාට්‍යය පුරා විහිදී ඇත්තේ උක්ත තතු වලට වගකිව යුතු අදිසි හස්තයන් පිළිබඳව ද ඉඟි කරමිනි.

සූරා කෑම, පීඩිතභාවය හා අකෘතඥ ධනවාදයේ නැගීම් මාත‍්‍රයන් නාට්‍යය අවසානයේ පේ‍්‍රක්ෂකයා හමුවට පැමිණෙයි. අසරණ බවේ පත්ලේ ගිලී සිටින වැන්දඹුවන් හා කැප්ටන්, ලයිතන් ප‍්‍රමුඛ හමුදා චරිත තුන නාට්‍යය පුරාවටම කරළිය උණුසුම් කරති. මිලිටරිය උපරිම බලය යොදා පීඩිතයින් තවදුරටත් අසරණ බවෙහිම ගිල්වනුයේ එරෙහිව නැගිටීමක් ගැන සිතීමටවත් ඉඩ නොතබමිනි. එසේ වුව ද මෙහි එන හමුදා නිලධාරීහු පූර්ණ වශයෙන් ස්වාධීන චරිත නොවෙති. ඔවුන් ද කිසියම් බලවේගයක අවශ්‍යතාවය අනුව හැසිරෙන බව ඩෝෆ්මන් දැක්වුව ද අප දුටු නිෂ්පාදනයේ දී ඒ කාරණාව පැහැදිලි ලෙස දක්නට නොලැබිණි.

ගම්වාසී වැන්දඹුවන් ධන බලයෙන්, අවි බලයෙන් මෙන් ම දෘෂ්ටිවාදීමය ලෙස ආගමේ නාමයෙන් ද මඩිනු ලැබෙයි. නන්නාඳුනන මළ සිරුරක් සම්බන්ධයෙන් වූ හඳුනා ගැනීමේ පෙරෙට්ටුව සාර්ථකව නිම වීමටත් පෙර ම මිලිටරිය සිය තීරණය ප‍්‍රකාශ කර හමාරය.

"හරි එහෙනම්... ජනතාවගෙන් ඇහුවා... ජනතාව තමන්ගේ මතය කිව්වා නොකිව්වා... ඒ වැඩේ ඉවරයි."



එරෙහිව නැගෙන අරගල මැඩ පැවැත්වීම සඳහා මිලිටරිය සිය සුපිරි බලය යෙදවීම පිළිබඳ අත්දැකීම් ලෝක ඉතිහාසය කොතෙකුත් විඳ ඇත්තේය. වහල් යුගයේ දී වහල් හිමියන්ට එරෙහිව නැගෙන වහලුන් මැඬ පැවැත්වීමට කසය ක‍්‍රියාකාරී වූවා සේ ම වැඩවසම් යුගයේ දී ද රදළයන්ගේ බලය ගොවි දාසයන් කුදු කරමින් නැගී සිටියේ ය. එපරිද්දෙන් ම ධනේශ්වර යුගයේ දී ගිනි අවිය නැගී සිටියි. මේ පිළිබඳ වන ඉතා සමීපත ම දේශීය අත්දැකීම වූ රතුපස්වල- වැලිවේරිය වෙඩි තැබීම ලෙහෙසියෙන් මකා දැමිය නොහැකි පැල්ලමකි. ඒ පුවත පිළිබඳ සවිස්තර වාර්තාවක් සපයන සමාජවාදී සමානතා පක්ෂය හමුදාවේ සුපිරි බලය පිළිබඳව සිය වෙබ් අඩවියේ මෙසේ සටහනක් තබයි.

"පළමුව හමුදා භටයෝ මාධ්‍යවේදීන්ට තර්ජනය කළහ... ඒ අතර හමුදා භටයෝ මිනිසුන්ට වෙඩි තැබීමටත් පහර දීමටත් පටන් ගත්හ. ඔවුහු නිවාස, පල්ලි, කන්‍යාරාම හා වෙනත් තැන් වලට කඩා වැදුණහ... බියෙන් සැඟවීගත් සියල්ලන් ම ඇද ගෙන විත් ඔවුන්ට දරුණු ලෙස පහර දුන්හ..." (-wsws)

දහස් ගණන් වැන්දඹුවෝ තවත් පසෙකින් සුවිශේෂී වන්නේ ඩෝෆ්මන් මෙම පීඩනයට පත් වැන්දඹුවන්ගේ ජීවිතවල මෙන් ම මිලිටරි ක‍්‍රියාධරයින්ගේ ජිවිත වල ද දෘෂ්‍යමානය විනිවිද ඒවා පසුපස වන ක‍්‍රියාකාරි බලවේග ඉසියුම් ලෙස හෙළිදරව් කරන්නට සමත් වී ඇති නිසාය. අප නැරඹූ නිෂ්පාදනයේ දී මේ තතු එතරම් ප‍්‍රබල ආකාරයෙන් මතු වී නොපෙණුන ද පෙළ පක්ෂයේ වන ගම්භීර බව නිසා ම නාට්‍යමය ගලා යාමට එය හානියක් නොවීය. කෙසේ වුව ද කස්තෝරියෝ නමැති ඉඩම් හිමි රදළයාගේ හස්තයේ නැටවෙන වැන්දඹුවන් මෙන් ම මිලිටරියේ මහත්වරු ද ස්වාධීන නොවෙති. සෑම යුගයක ම සිදු වූවා සේම එරෙහිව නැගෙන්නන් මැඩීම සඳහා මර්දන උපකරණ යොදා ගනිමින් යෙහෙන් වැජඹීමට තැත් දැරීම පාලක පංතියේ කස්තෝරියෝලාගේ ස්වභාවය යි.

සොෆියා පොන්ටිස් (වැන්දඹුවන් අතර වයෝවෘද්ධ ම තැනැත්තිය) ගඟෙහි පාව ආ මළ සිරුර සිය භූමියේ ම වළ දැමීම සඳහා ප‍්‍රාදේශීය හමුදා ප‍්‍රධානියාගෙන් අවසර ගැනීමට ගොස් ය. ලයිතන් තැන හමුදා බලය ද රැගෙන දේහය හමුදා භාරයට ගැනීමට පැමිණෙයි. බියපත් වන වැන්දඹුවෝ ඊට එරෙහිව නොගොස් මුළු ගැන්වෙති. සොෆියාගේ මිනිබිරිය, පිඩෙලියා පමණක් මළ සිරුරෙන් නොමිදී එය රැකගෙන සිටින්නීය.

ලයිතන් පිඩෙලියා දෙසට අඩියක් තබයි. ඇයව උරපතින් අල්ලා ඔසවා පැත්තකට කරන ගමන් ම මුහුණ තදින් ම සිප ගනියි....

මේ සිදුවීම හඬ ගා කියන්නේ කුමක් ද? පසුගිය අවුරුදු කිහිපය තුළ මෙරට බිහි වූ සිනමා කෘති ගණනාවක් ම වාරණයට ලක් වූයේ රජයේ හමුදා අපහාසයට පත්කිරීමට තැත් කිරිමේ උත්සහායක ඵලයක් යන හංවඩුව ගසමින් ය. යුද්ධයේ මානුෂික ස්වරුපයන් හුවා දැක්වූවෝ දැවැන්ත රංගශාලා තුළ මහා නළු ඉදිරිපත් කරමින් නැවත නැවත මතුවිය හැකි රුදුරු බලවේග පිළිබඳ තතු කියා එක් පාර්ශවයක බලය සාධාරණීකරණය කළහ. කිසිදු සිංහයෙක් තණ නොබුදින්නා සේ ම කිසිදු යුද්ධයක් මානුෂීය නොවේ. මේ සියල්ල මෙහෙයවන දෘෂ්ටිවාදයන් විනිවිදිය හැකි කලා කෘති නැවත නැවත විමසීම යුගයේ කාර්යභාරය යි.



සිය නිජබිම් අහිමි වූ ජනයාගේ සැබෑ ඉල්ලීම දැන් දෙයාකාරයකින් යටපත්ව ගොස් ඇත. ඒ වෙනුවට සිය සමීපතමයන්ගේ හද ගැහෙන ඇසුර නොව සීතලව ගිය, ප‍්‍රාණය නිරුද්ධ වූ කලේබරයන් පමණක් ඉල්ලීම දක්වා ඔවුන්ගේ අයැදීම් සංශෝධනය වී ඇත්තේය. මහලු සොෆියා පොන්ටිස් අතුරුදන් වූවන්ගේ නම් කියා කරන විලාප නැගීම මෙරට මෑත කාලීන අත්දැකීම් හා කොතරම් දුරට සැසඳෙන්නේදැයි බැලුව මැන!

"කෝ මිගෙල්, කෝ මගේ තාත්තා... කෝ එමිලියානෝ... කෝ කියාපං බලන්න... කෝ ඇලන්සෝ... යනිනා කියාපං බලන්න ඇලන්සෝ කෝ... කෝ ඇන්තෝනියෝ, කෝ තියෝ, කෝ රාවුල්, කෝ ලුවිස්... කෝ පබ්ලෝ... හර්මානෝ... ක්ලෝඩියෝ...ජෝක්... ජුවාන් හෙන්ඩි‍්‍රක්... උඹලා කොහේ ගියාද? අනේ කියාපල්ලා. මගේ දරුවනේ....."

කුණු වී ඕජස් ගලන සමාජ ක‍්‍රමයක හිඳ ජාතික මෙන් ම ජාත්‍යන්තර මානව හිමිකම් වාර්තා තොග ගණන් සම්පාදනය කළ ද ඇමරිකාව වැනි කේන්ද්‍රයේ රටවල සිට ලංකාව වැනි පරිධියේ රටවල් දක්වා ඒවා අඛණ්ඩව ක‍්‍රියාත්මක වන්නේ නම් දැල් කූඩයෙනුත් වතුර ගෙන යා හැකි වනු ඇත.

සංජීව ගුණරත්න සිය අධ්‍යක්ෂණ කාර්යයේ දී මුල් පිටපතේ එන දර්ශන අංක කිහිපයක් ම අඩු වැඩි වශයෙන් ඉවත් කරමින් මෙරට වේදිකාව සඳහා උචිත රංගයක් නිර්මාණය කරන්නට වෙහෙසී ඇති බව නාට්‍ය පෙළ විමසීමෙන් පෙනී යයි. නාට්‍ය පිටපතෙහි විටින් විට රංගයට මැදිහත් වන නිවේදක චරිතය නිෂ්පාදනයේ දී සම්පූර්ණයෙන් ම ඉවත් කොට ඇත. නාට්‍යයේ ඒකීය ධාරණාවක් පවත්වාගෙන යාම සඳහා එය සාධනීය එළැඹුමකි. එමෙන්ම ගුණරත්න සිය නිෂ්පාදනයේ දී නාට්‍යයෙන් හෙළිදරව් කරන පාලක පංතියේ දෘෂ්ටිය පිළිබඳ විග‍්‍රහයට අදාළ රංග කොටසක් ස්ථානෝචිතව යොදා ගැනීම පැසසිය යුත්තකි. සොෆියාගේ සැමියා යැයි අනුමාන කළ මෘත දේහය පිළිබඳ අයිතිය මිලිටරියේ උපක‍්‍රමයකින් සිසිලියා නැමැත්තියගේ සැමියා, තියෝගේ යැයි තහවුරු වූ පසු දේහයට අදාළ ආගමික වතාවත් කරන පාදිලිවරයා හදවතින් වැළපෙන සොෆියාට මෙසේ කියයි.

"සොෆියා.... මේ අහපං! දෙවියන් වහන්සේ කටයුතු කරන්නෙ අපට නොතේරෙන විදියට...."

දෙවියන් වහන්සේ පිළිබඳව කරන මේ සඳහන, ආගමේ නාමයෙන් සියල්ල විඳ දරාගෙන සැනසෙනු යන මුසාවාදය පළිප්පු කරවයි. සැබෑ ලෝකයේ දෙවියෙක් නැත. ඇත්තේ දෙවියන් පිළිබඳ දෘෂ්ටිවාදයක් පමණි; මිනිසා විසින් ම නිර්මාණය කරන ලද මිනිසාගේ ම පරත්වාරෝපිත ප‍්‍රතිමූර්තියක් පමණි. සෘජුව ම නොවුව ද, මේ තත්ත්වය පාලකයන්ගේ අරමුණ තෘප්ත කර ගැනීමට ආධාර දීමක් වන්නේය. දෙවියන් වහන්සේ අතුරුදන් වූවන් ගෙන එන තෙක් බලා සිටියහොත් මේ වැන්දඹුවෝ සදාකල්හි ම වැන්දඹුවෝ ම ය.

මිලිටරිය නා නා උපක‍්‍රම යොදා මේ අහිංසකයන් මඩින්නේ කුමටද? නාට්‍යයට අදාළ කෘතිය (-Widows නාට්‍යයට අදාළ මුල් කෘතිය ඒරියල් ඩෝෆ්මන් ගේ Widows නවකතාවයි-) බිහි වූ සමයේ රට කළ හමුදා පාලකයෝ ජනාධිපති අයියන්ඩේ ඝාතනය කොට සිය බලය තහවුරු කරගත්තෝය. චිලී දේශය දකුණු ඇමරිකානු රටක් වුව ද මේ කලාපයේ ඉහළ ම බලවතා ඇමරිකාවයි. කිසිවිටෙක තම අධිරාජ්‍යවාදී ක‍්‍රියා පිිළිවෙතට එරෙහිව නැගී එන බලවේග නොඉවසන ඇමරිකාව ලෝකයේ බොහෝ රට වලට කළ හදිය ම චිලී දේශයට ද කළේය. නාට්‍යයේ අප දකින මිලිටරි නිලධාරීන් ගම නිසරු බවත්, මේ තතු යටතේ පොහොර ෆැක්ටරියක් හැදීම සුදුසු බවත් කියන්නේ ධනවාදයේ නොනවතින ලාභ ඉපයීමේ ගෝරනාඩුව මොනවට හෙළිදරව් කරමිනි. දිනෙන් දින පීඩාවට ම පත්වෙන වැන්දඹුවන්ට නැතිවෙන්නට තවත් දෑ නොමැත්තේය. යදම් වලින් බැඳ දැමූවෝ යදමට පේ‍්‍රමකරන්නට පටන් ගත්තාක් මෙන් සමීපතමයන්ගේ මළ සිරුරු ගසාගෙන එන තෙක් මඟ බලා සිටීමට ඔවුහු පෙළඹුණහ. ඒ කාරණය සමස්ත ක‍්‍රියා සන්තතියේ ම අඛණ්ඩ ඵලයක් ලෙසින් හමුදා ප‍්‍රධානියාගේ මුවින් පිට වෙයි.

"කෙළල දාන්න ඕනෑ මේකට. ජලාශයේ පතුලට ම දානවා හොඳ කොන්ක‍්‍රීට් තට්ටුවක්. හදනවා මල් මල් ජලාශයක්. ආහ්.... පෙම්වතුන්ට ඇවිත් ඔරු පදින්න පුළුවන් නිවාඩුවට.... කාටද නරකයි කියන්න පුළුවන් එතකොට..."

මිනිසුන්ගේ මර ලතෝනි මැද ඉදිවන සුන්දර උයන් සදාකල්හි ම පවතී යන පාලකයන්ගේ උපකල්පනය බිඳ වැටෙන්නේ ඔවුන් ම තැනූ උපකරණ මතිනි. නාට්‍යාවසානයේ එක්රොක්ව නැගී එන වැන්දඹුවෝ එහි සංකේතයෝය. නැගී එන්නන් උපරිමයෙන් මැඩ පැවැත්වීම හැර සාමදාන වීමක් කොයින් ද?



"පට්ට වේසියන්ටයි මේ කියන්නෙ. මේ තමයි අන්තිම චාන්ස් එක. පලයව් තොපේ ගෙවල් වලට. මට එක වචනයයි කියන්ඩ තියෙන්නෙ. වැඩේ සිද්ධ වේවි..."

නාට්‍ය අධ්‍යක්ෂකවරයා වැන්දඹුවන් පෙරට ගෙන එන්නේ හද ගැස්ම වැඩි කරවන ප‍්‍රයෝගානුසාරයෙනි. සිය අත්වල ඇති හැලි-වළං වලට හැඳි ආදියෙන් පහර දෙමින් ඒකීය රාවයක් ගොඩනගන ඔවුහු නාට්‍යයේ තීව‍්‍රතර ම අවස්ථාව මවති. උපක‍්‍රමික වශයෙන් මේ දසුන අරුත් කිහිපයක් මවයි. එකක් කාන්තාවන් සිය හැලි-වළං අතට ගෙන පෙරට ඒමයි. හැලි-වළං ස්ත‍්‍රියගේ උරුමය කොට සැලකූ පුරුෂෝත්තමවාදී දෘෂ්ටිවාදයට පහර පිට පහර එල්ල කිරීමත්, ස්ත‍්‍රියගේ නිදහස පිළිබඳ තීව‍්‍රතර හඬ නැඟීමකුත් ඉන් සිදු වේ. දෙවැන්න නම් මෙතෙක් බියෙන් හැකිළී සිටි වැන්දඹු පිරිස ඒකීය රිද්මයකට සිය අතැති හැලි-වළංවලට තැලීමෙන් ඒකරාශී වන ශක්ති සංකේතයත්, ඔවුන්ගේ ආධ්‍යාත්මයන්හි විප්ලවීය හැඟුම් පිබිදීමත් සංකේතවත් කරයි. තව දුරටත් පාලකයාගේ අනදර විඳීම පසෙකලා තම උරුමය ලෙස හංවඩු ගැසූ හැලි-වළං වලින් ම මිලිටරියට අභියෝග කිරීමත් ඔවුන්ගේ අභිමතය යි.

එසේ වුවත් හමුදා ප‍්‍රධානියාගේ අණින් එසවෙන ගිනි අවි හමුවේ වැන්දඹුවන්ගේ රණගොස ඇණහිටියි. පේ‍්‍රක්ෂකයා සුපුරුදු ලෙස බලාපොරොත්තු වූ වෙඩි වරුසාව නොඇසී වේදිකාව අඳුරු වෙයි. (මීට පෙර දර්ශන කිහිපයකදී ම වෙඩි හඬ ඇසිණි. සොෆියා සහ ඇගේ මුණුබුරාට වෙඩි තැබීමේ සිදුවීමක් ද ඒ අතර විය.) මේ අරගලය තවමත් නිම නොවූ බව හෝ නො එසේ නම් ගිනි අවිය නමැති සංස්කෘතික බලවේගය හමුවේ වැන්දඹුවන් නිහඬ වූ බව යන කාරණා අඳුරේ ගිලුණ පේ‍්‍රක්ෂක සිත් තුළ පෙරළි කරන්නට පටන් ගනියි. මේ කොයික වුව ද සටන නොනිමි බව අවසාන වශයෙන් එළැඹිය හැකි නිගමනය යි.

අවසාන පෑන් පහරින් අපි අධ්‍යක්ෂවරයාට සුබ පතමු. ඔහු තැබූ අවිනිශ්චිතාර්ථ දනවන අවසානය නාට්‍යය පිළිබඳ කියවීම් කිහිපයකට ම පිවිසීමට මං පාදයි. ප‍්‍රතිගාමීත්වයේ නොරඳවා පේ‍්‍රක්ෂකයා සිතුවිලි සයුරේ ගිල්වයි.

(විශේෂ ස්තූතිය- විචාරය සඳහා පාදක වූ දහස් ගණන් වැන්දඹුවෝ අත් පිටපතක් අප වෙත සැපයූ විද්‍යාර්ථී දිල්හි රණතුංගට)
මේ වියමන ඔබේ මූණු පොතට එක් කරන්න-
Tags- Widows by Vladimiro Ariel Dorfman, Dahas Ganan Wandambuwo by Sanjeewa Gunarathna, Salvador Allende, Chile, Augusto Pinochet, Sinhala Drama, Sri Lankan Drama, Lakhman Fernando
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
කේ.ඩී. දර්ශනගෙන් තවත් වියමන්
Cine
"මේ රට මගෙ නෙවෙයි; මගෙ අම්මගෙත් නෙවෙයි" සමඟ "28" කියවීම
රංග
ආදරයේ දයලෙක්තිකය- සුරූපිය හා මෘග
අදහස්
ඩෙරීඩාගේ විශ්වවිද්‍යාලය සහ කැලණියේ නවකවදය
තවත් රංග බූන්දි
දෙවියන් බුදුන් මැරී බොහෝ කල්ය! -"මායා බන්ධන"- විචාරාත්මක විමර්ශනයක්
මහගම සේකරගේ නාට්‍ය සාහිත්‍යය සහ ජීවන දෘෂ්ටිය
ඇරිස්ටොෆනීස් -සම්භාව්‍ය කොමඩියේ පියා- සහ ඔහුගේ කෘති
මරණය සහ කන්‍යාවිය මැවූ ඒරියල් ඩෝෆ්මන්
යුරිපිඩීස් චිත්‍රණය කළ ස්ත්‍රීත්වය
බූන්දි නව ඊමේල් ලිපිනය- editorial@boondi.lk
BoondiLets
බර්ටොල්ට් බ්‍රෙෂ්ට් කියයි.
කලාව යනු යථාර්ථය ඉදිරියෙහි තබා ඇති කැඩපතක් නොවේ. යථාර්ථය හැඩගස්වනු පිණිස හෙලනු ලබන යකුළ් පහරකි.
What's New | අලුතෙන්ම
කවි| මාතෘ වාට්ටුව ඉදිරිපිට මල් පිපුණු සල් ගස

30-Secs

(පද්මිණි ශ්‍රියාලතා ) මායා මව් බිහිකරන විට ලොවට බුදු පුතෙක්
අතු නමා පාත් කර සැනසුවේ සල් ගහක්
මල් නෙළන්නට කියා එක වසරෙ ‍පෙළ පොතක්
කාලයක් දරුවනට පෙන්නුවෙත් සල් ගහක්

මේ මෙතන තිඹිරිගෙයි ඉදිරිපිට රෝහලේ... [More]
අදහස්| ගබ්සාව සහ දෙවියන් වහන්සේගේ සැලැස්ම!

3-Mins

(තාරක වරාපිටිය) "දරුවෙක් උපදිනවා කියල කියන්නේ, දෙවියන් වහන්සේගේ සැලැස්මෙනුයි ජීවිතය උදා වෙන්නේ. එක දරුවෙක්වත් දේව සැලැස්මෙන් පිට ඉපදෙන්නේ නැහැ." යෝජිත ගබ්සා නීති... [More]
ගී කිය(ව)මු| සඳ, හොරෙන්- හොරෙන්- හොරෙන්- බලමු!

4-Mins

(ඩිල්ෂානි චතුරිකා දාබරේ) ප්‍රේමයට රාත්‍රිය මහෝපකාරීවන්නේ යම් සේ ද ශෘංගාරෝද්දීපනයට සඳ සතු කාර්යභාර්ය ද එසේ ම වේ. ළමා ලපටියන් සඳ දකිනුයේ සිය කුටුම්බ... [More]
කතන්දර| සරසවි ශිෂ්‍යයාගේ මරණය

6-Mins

(සහන් කසීර වික්‍රමසිංහ) ප්‍රවෘත්ති සංස්කාරක තුමනි,
සති දෙකකට උඩදි ගෙලවැල ලාගෙන සියදිවි නසාගත් 'කසුන් හේරත්' නම් සරසවි ශිෂ්‍යයාගේ (ශිෂ්‍ය සංගම් නායකයෙක් ලෙස ද... [More]
කවි| ප්‍රේමයක් ඇති වුණේ නෑ!

45-Secs

(භාතිෂ අකලංක සිල්වා) එක ගමේ, ළඟ ගෙවල්,
එක වයස, ඒ වුනත්
කළු කෙල්ලෙ නුඹේ ගැන
කිසිදාක මගෙ හිතේ
ප්‍රේමයක් ඇති වුණේ නෑ!... [More]
කතන්දර| "එඩිසන්ගෙ අම්මා"- ළමා කතන්දරය [වීඩියෝව]

12-Secs

තෝමස් අල්වා එඩිසන් කියන මහා විද්‍යාඥයා ගැන චූටි ටීචර් කියන අපූරු කතාවක්-

Voiced by- Masha Suwani and Nayomi Gunasiri
Script and Animated... [More]
අදහස්| විභාගය ගොඩ යාමට ඥාන පූජාව!

2-Mins

(තාරක වරාපිටිය) ස්ථානය- වේයන්ගොඩ, පත්තලගෙදර බෝධිමංගලාරාමය විහාරස්ථානය
නිමිත්ත- ශිෂ්‍යත්ව විභාගය වෙනුවෙන් පෙනී සිටින සිසු-සිසුවියන් හට උසස් ප්‍රතිඵල ලබා ගැනීම උදෙසා පවත්වනු ලබන විශේෂ... [More]
අදහස්| [සරදගේ ලියුං හැකින්ස්]- සිරිසේන මහත්තයාට ලියා ඔප්පු කරන වග නම්...,

2-Mins

සෑර්,

සෑර් කැකිරාව පැත්තේ ඇවිල්ල කුඹුරු ටිකක් එහෙම හාලා දීලා, මදිවට වගා සංග්‍රාමයක් එහෙමත් පටන් ගන්නව කියල ආරංචියක් ආව. ආසාවේ උහුලගන්ඩ... [More]
කවි| පටාචාරා

1-Mins

(ප්‍රියලාල් කොග්ගලගේ) සැවැත් නුවරත් නොවෙයි, සිටු කුලේකත් නොවෙයි පටාචාරා ඉපදුණේ
බුදුන් වැඩියත් රජුන් නොවඩින ඈත දුර මහියංගණේ
ඈ කැටුව ආ දාසයා වෙමි ඉපිද ඈ පිළිබඳ සෙනේ
අතු පැහීමයි ගෙඩි කැඩීමයි දත් එකම ශිල්පය වුණේ

පුතෙකු වැදුවා, දුවක වැදුවා මමත් පොඩි අතුපැලක් හැදුවා... [More]
රංග| දෙවියන් බුදුන් මැරී බොහෝ කල්ය! -"මායා බන්ධන"- විචාරාත්මක විමර්ශනයක්

10-Mins

(ප‍්‍රනීත් චානක මුරමුදලිගේ) වත්මන

පරමාදර්ශී කලාවන්ට කණකොකා හඬන 2017 වැනි යුගයක, තරුණ නාට්‍යකරුවන්ට සෙත්ශාන්තියක් මෙන් වූ ජාතික තරුණ සේවා සභා නාට්‍ය තරඟාවලිය මෙවරත් යම්... [More]
පරිවර්තන| අඳුරු ගොම්මනක කතාව

16-Secs

(ෆතීක් අබූබකර් | මාලතී කල්පනා ඇම්බ්‍රෝස්) මැටි බඳුන
පිරී යයි
මා හෙවත්
පිරියම් නො කළ
වදනින් ...
සිත්තම් කරමි... [More]
කවි| නෙළුමෙහි කුහුඹු මිනිසාට

24-Secs

(දුලන්ජන් විතාරම) වළාකුළු සිඹී ඉහළට නැගුනාම
බලා නෙත් අහස මුදුනේ රැඳුනාම
රවා බලන ඉර තරහින් බැලුවාම
නිවා විඩා දුරලා නුඹ ගනු කෝම

පියාඹන කාක පෙරහැර නිරන්තරේ... [More]
කතන්දර| "සිංහයාට දත් කැක්කුමක්"- ළමා කතන්දරය [වීඩියෝව]

29-Secs

Sanjiv Jaiswal 'Sanjay' ලියා, Ajit Narayan සිත්තම් කළ "The Royal Toothache" සිඟිති කතන්දරය ඇසුරින් හැදූ කාටූනය.

Sinhala Translation of the... [More]
කවි| මායිම් ගම්මානයේ ටීචර්

21-Secs

(අනුෂ්ක තිලකරත්න) ඒ ටීචර් ඔච්චර ම හිනාවෙන්නේ මොකද?
මොකද නෙමෙයි කොහොමද?
දන්නේ නැද්ද තවමත්
මායිමේ ගම්මානයක් බව මේක

තාමත් ලයිට් නැති... [More]
BoondiLets| ඇල්බට් අයින්ස්ටයින් කියයි.
ඔබට ඔබේ පුංචි දරුවා බුද්ධිමත් කිරීමට අවශ්‍යද? දරුවාට සුරංගනා කතා කියා දෙන්න. ඔබට ඒ දරුවා තවත් බුද්ධිමත් කිරීමට අවශ්‍යද? දරුවාට තව තවත් සුරංගනා කතා කියා... [More]
කතන්දර| "කපටි නරිහාමිට ඔන්න යස පාඩම"- ළමා කතන්දරය [වීඩියෝව]

34-Secs

"Foxy Joxy Plays a Trick" සිඟිති කතන්දරය ඇසුරින් හැදූ කාටූනය.

Sinhala Translation of the Kids Story "Foxy Joxy Plays a... [More]
වෙසෙස්| එක ම ගඟට දෙවරක් නොබට මිනිසා, හෙරක්ලීටස්

4-Mins

(ඩිල්ෂානි චතුරිකා දාබරේ) අපරදිග ලෝකයේ බටහිර දර්ශනය බිහිවීමට තුඩුදුන් ප්‍රධාන භූගෝලීය මර්මස්ථානය වූ ග්‍රීසිය අයෝනියන්වාදීන්, ඊලියානුවාදීන්, පෛතගෝරස්වාදීන්, විතණ්ඩාවාදීන් හා සෙසු දාර්ශනිකයන්ගෙන් සුසැදි ඥාන... [More]
පොත්| කැත මත ලස්සන සෙවීම- සරද සමරසිංහ ප්‍රබන්ධ ප්‍රවේශය

4-Mins

(මංජුල වෙඩිවර්ධන) සමාජ ජීවිතය අපසාරී වෙමින් ද, ව්‍යුක්ත වෙමින් ද පවතින දේශපාලන මොහොතක අභීසාරී මෙන් ම සංයුක්ත ජීවන යථාර්තයක් වෙත පර්යාලෝකයක් එල්ල... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook